Georgia online լրատվական կայքը երեկ` փետրվարի 8-ին տեղեկատվություն հրապարակեց այն մասին, որ փետրվարի 5-ից սկսած Վրաստանը հանդիսանում է տարանցող երկիր՝ Ռուսաստանից Հայաստան էլեկտրաէներգիայի ստացման: Նույն աղբյուրի փոխանցմամբ, 24-ժամում Հայաստանը կստանա միջինը 30 մեգավատ հզորության էլեկտրաէներգիա:
Այս առնչությամբ, Aravot.am-ը ՀՀ Էներգետիկայի եւ բնական պաշարների նախարարությունից հետաքրքրվեց, թե ճի՞շտ է արդյոք այս տեղեկատվությունը եւ եթե այո, ինչո՞ւ է Հայաստանը գնում էլեկտրաէներգիա, այն դեպքում, երբ մենք էլէներգիա արտադրող եւ արտահանող երկիր ենք:
Էներգետիկայի եւ բնական պաշարների նախարարությանը հարց ուղղեցինք նաեւ, թե ինչո՞ւ է Հայաստանում առաջացել էներգադեֆիցիտ եւ էլեկտրաէներգիա ներկրելու անհրաժեշտություն, եթե Հայաստանի ատոմային էլեկտրական կայանը` ՀԱԷԿ-ը դեռեւս աշխատում է: Հարցրինք նաեւ` էլեկտրաէներգիան Ռուսաստանից ի՞նչ գնով ենք գնում:
Նախարարությունից վերոնշյալ տեղեկատվությունը հաստատեցին` նշելով, որ
Էներգաարտադրության հաստատված հաշվեկշռով փետրվարի համար նախատեսված «Հրազդան ՋԷԿ»-ի արտադրած էլեկտրաէներգիան, որն ամենաթանկն է էներգահամակարգում, էժանով փոխարինելու նպատակով, պայմանագիր է կնքվել Վրաստանի «Միջազգային էներգետիկ կորպորացիայի» հետ՝ Հայաստան էլեկտրաէներգիա մատակարարելու վերաբերյալ։
Ըստ նախարարության, համաձայն այդ պայմանագրի, փետրվարի 5-ից սկսվել են մատակարարումները եւ նախատեսվում է մինչեւ ամսվա վերջ ներկրել 20 մլն ԿՎտ ժամ կամ միջինը օրական 650-700 ԿՎտ ժամ էլեկտրաէներգիա։
Կարդացեք նաև
«Պայմանագիրը կնքվել է էներգահամակարգի տնտեսական շահավետությունից ելնելով։ Ի տարբերություն «Հրազդան ՋԷԿ»-ի, որի արտադրած էլեկտրաէներգիայի սակագինը 35,78 դրամ է, կնքված պայմանագրի շրջանակներում էլեկտրաէներգիան ձեռք է բերվում 6,3 ցենտով, ինչը Կենտրոնական բանկի այսօրվա փոխարժեքով համարժեք է 31,1 դրամին»։
Նախարարությունից հավելել էին, որ երկու դեպքում էլ սակագները նշված են առանց ԱԱՀ-ի:
Լուսինե ԲՈՒԴԱՂՅԱՆ
