Քիչ առաջ ավարտվեց ՀՀԿ ԳՄ նիստը: Նիստի ավարտից հետո ՀՀԿ մամուլի խոսնակ Էդուարդ Շարմազանովն ասաց, որ նիստի ընթացքում քննարկվել են ներկուսակցական ներքաղաքական, արտաքին քաղաքական խնդիրներ: Գործադիր մարմնի նիստում հիմնական անդրադարձը եղել է Հայ հեղափոխական դաշնակցության հետ համագործակցությանը:
«Հայ հեղափոխական դաշնակցության հետ Հանրապետական կուսակցությունն ունի, ընդհանուր առմամբ նախնական համաձայնություն՝ ապագայում կառավարման համակարգում միասնաբար աշխատելու մասին: Վերջնական համաձայնության մասին կխոսենք մինչեւ շաբաթվա վերջ»,- ասաց նա:
Էդուարդ Շարմազանովն ընդգծեց, որ Հայ հեղափոխական դաշնակցության հետ Հանրապետականը շատ հավանական է համարում համաձայնությունը. «Կա նախնական համաձայնություն, նախնական բառը նշանակում է, որ վերջնական չէ: Եվ ես իրավունք չունեմ հրապարակային՝ որպես խոսնակ անուն-ազգանուններով հրապարակել: Նախկինում, եթե մենք ասում էինք, որ համաձայնությունը հնարավոր է, այսօր կարող եմ ասել, որ ՀՅԴ-ն եւ Հանրապետական կուսակցությունը ունեն ընդհանուր համաձայնություն եւ եկել են նախնական համաձայնության՝ ապագայում Հայաստանի քաղաքական օրակարգում միասնաբար հանդես գալու համար»:
Ամի ՉԻՉԱԿՅԱՆ
