Գյումրեցի պատգամավոր, ՀՀԿ-ական Սուքիաս Ավետիսյանը Գյումրիի 102-րդ ռազմաբազայի պայմանագրային զինծառայող Սերգեյ Վասիլի Սուդնիկովի՝ Անի թաղամասում բնակվող Երանոսյանների ընտանիքին գիշերվա կեսին հարբած վիճակում լեղապատառ անելը համարում է արկածախնդրություն: Ըստ պատգամավորի, քրեական գործ հարուցելու խնդիր չկա, այս հարցում հերթական անգամ խնդիր ունեն ռազմաբազայի ու ՌԴ զինված ուժերի ղեկավարությունը: Վերջիններս, ըստ Սուքիաս Ավետիսյանի, պետք է հաստատեն այնպիսի կարգապահություն, որ նման դեպքեր այլեւս չկրկնվեն: «Եթե չլիներ 2015 թվականի հունվարի 12-ը, այդ ցավոտ ու բոլորիս համար ծանր դեպքը, բնական է նման զինվորականների արկածախնդրությունը մենք միշտ տեսնում ենք, տասնամյակներ շարունակ տեսել ենք», -ասում է պատգամավորը:
Սուքիաս Ավետիսյանը, ի նկատի ունենալով այն, որ 2016 թվականի հունվարի 1-ից ուժի մեջ է մտել ՌԴ նախագահ Վլադիմիր Պուտինի հրամանագիրը, որով թույլատրվում է ՌԴ-ից դուրս գտնվող ռազմաբազաներում աշխատանքի ներգրավվել այլազգի ներկայացուցիչների, ռուսական կողմին առաջարկում է Գյումրու ռազմաբազայում պայմանագրային զինծառայության մեջ ներգրավվել տեղի բնակիչներին: Իսկ սա, ըստ գյումրեցի պատգամավորի, հնարավորություն կտա, որպեսզի Գյումրիի ու առհասարակ Շիրակի մարզի այն բնակիչները, որոնք համապատասխանում են այդ ծառայությանը, կարողանան պայմանագրային աշխատանքի անցնել: Այսպես, ըստ Սուքիաս Ավետիսյանի, ե՛ւ աշխատատեղեր կստեղծվեն տեղի բնակիչների համար, ե՛ւ գյումրեցիները հանգիստ ու ապահով կլինեն, որ նման արկածախնդրություններ չեն լինի:
Aravot.am-ի հարցին՝ իսկ եթե ՌԴ-ն՝ որպես այլազգի զինծառայողներ, մեր թշնամի երկրից բերի՞ Գյումրի, պատգամավորն ասաց. «Չեմ կարծում նման խնդիր լինի, որովհետեւ այնտեղ հստակ գրված է այն տարածքներում, որտեղ կան… Եթե Հայաստանում է, ուրեմն Հայաստանի բնակիչների մասին է, եթե Տաջիկստանում է, ուրեմն Տաջիկստանի բնակիչների մասին է , տեղի բնակիչների մասին է խոսքը»:
Կարդացեք նաև
Ավետիսյանների սպանության գործով էլ Սուքիաս Ավետիսյանը, թեև փաստաբաններից ստացել է որոշ «ինչո՞ւ»-ների պատասխաններ, մասնավորապես Վալերի Պերմյակովի սատանիստ լինելը շատ բան է ասում, սակայն գլխավոր «ինչո՞ւ»-ներից մեկը նրա համար անհայտ է: «Ինչո՞ւ» ընտրեց հենց Ավետիսյանների ընտանիքը, երբ Պերմյակովի ճամփին այլ տներ կային, իսկ նա դասալքության վայրից մոտ 4 կիլոմետր կտրելով՝ եկել է այդ բազմանդամ ընտանիքը ոչնչացնելու:
Նունե ԱՐԵՎՇԱՏՅԱՆ
