Փետրվարի 14-ին տեղական ինքնակառավարման մարմինների ընտրություններ են կայանալու Լոռու մարզի Թումանյան, Սյունիքի մարզի Տաթեւ եւ Տավուշի մարզի Դիլիջան համայնքներում:
Սյունիքի մարզում իր թեկնածությունը դրել է երեք թեկնածու՝ Տաթեւի գյուղապետ, ՀՀԿ-ական Մուրադ Սիմոնյանը եւ Շանուհայրից անկուսակցականներ Իգոր Աբրահամյանը եւ Վարշամ Բագրատյանը:
Իգոր Աբրահամյանը ասաց, որ Շինուհայրում փողոցներ կան, որ կոյուղագծեր չունեն, ընտրվելու դեպքում պատրաստվում է շտկել այդ խնդիրը, նաեւ իր ծրագրերի մեջ են մտնում ապահովել փողոցների լուսավորվածությունը, ցանկապատել գերեզմանները, մանկապարտեզի գազաֆիկացում, հանդիսությունների, սգո սրահի կոսմետիկ վերանորոգում: Թեկնածուն ընդգծեց, որ ծանոթացել է նաեւ այլ համայնքների խնդիրներին՝ կան գազաֆիկացման, ճանապարհների, ոռոգման ջրի խնդիրներ. «Ես նախկինում եղել եմ զինվորական, ծառայել եմ մի շարք զորամասերում, միշտ ղեկավար պաշտոնների, ժողովի մեծամասնությունը իմ զինվորներից է եղել, շփվել է հետս, մեծամասնությունը ինձ ճանաչում է, նամանավանդ, մեր գյուղացիները»:
Իգոր Աբրահամյանը համայնքների խոշորացման ծրագիրը առաջընթաց է համարում. «315 համայնք ղեկավարելը ավելի հեշտ է՝ ահագին հաստիքների կրճատում կլինի, որը մտնում է բյուջե: Հետո՝ կոնկրետ Սյունիքի մարզի մասին եմ խոսում եվրոպական երկրները շատ ներդրումներ պետք է անեն, ավելի շատ՝ իրենց ուզածով է արվել դա, որպեսզի ներդրում անեն մի համայնքում, ոչ թե անեն ընդհանուր ութ գյուղի վրա մի համայնքի եւ պահանջեն մի համայնքի պետից»:
Կարդացեք նաև
Թեկնածուն, սակայն, չկարողացավ թվարկել ծրագրի բացասական կետերը. «Բոլորս էլ այսօր գիտենք մեր Հայաստանի վիճակը: Օրինակ՝ կա գյուղ, ունի 15 բնակիչ, գյուղապետարանում ունի ութ հաստիք, 15-ից 7 հոգին աշխատում է հաստիքով, այսինքն՝ 1 ընտանիք աշխատում էր այդ հաստիքների վրա, իսկ հիմա, որ խոշորացումը եղավ, պետք է լինի երկու հաստիք»:
Ամի ՉԻՉԱԿՅԱՆ
