Փետրվարի 19-ը՝ ամենայն հայոց բանաստեղծ Հովհաննես Թումանյանի ծննդյան օրը, Հայաստանի գրողների միության (ՀԳՄ) լուսահոգի նախագահ Լևոն Անանյանի նախաձեռնությամբ և ՀՀ կառավարության որոշմամբ՝ 2008 թվականից Հայաստանում նշվում է որպես գիրք նվիրելու օր՝ Գրքի տոն:
Հայաստանի գրողների միության նախագահ Էդվարդ Միլիտոնյանը նկատել է, որ այս տոնը գնալով ավելի մեծ հետաքրքրություն է ձեռք բերում: Սակայն գիրք ընտրելն ու նվիրելն այնքան էլ հեշտ գործ չէ. «Մեր օրերում ով մի կոպեկ գումար ունի, գիրք է տպագրում ու «փաթաթում» հասարակության վզին: Դրա համար մարդիկ պետք է ավելի ուշադիր լինեն, մտածեն՝ արդյո՞ք գնելու, նվիրելու գիրք է: Ամեն գիրք չէ, որ պետք է նվիրել: Այսօր այնպիսի իրավիճակ է, որ վախենում ես՝ հանկարծ քո ընտանիք պատահական անուններ, պատահական հրատարակություններ չմտնեն, բովանդակությանն անծանոթ լինելով՝ հանկարծակիի չգաս, թե էս ինչ են գրել: Ամեն արտառոց բան հնարավոր է: Իսկ ամենացավալին այն է, որ մանկական այնպիսի ոտանավորներ կամ արձակ բարբաջանքներ կարող են հանդիպել, որ ուղղակի սահմռկես, թե դա ինչպես են հրատարակել»,- Գրողների միությունում այսօր լրագրողների հետ հանդիպման ժամանակ իր մտահոգությունը հայտնեց Էդվարդ Միլիտոնյանը:
ՀԳՄ նախագահը տեղեկացրեց նաև, որ Միության անդամները վաղը՝ Գիրք նվիրելու օրը, կայցելեն մայրաքաղաքի և մարզերի ուսումնական հաստատություններ, հանդիպումներ կունենան տոնի առթիվ:
Տոնին ընդառաջ, Էդվարդ Միլիտոնյանն այսօր գրքեր նվիրեց և պատվոգրեր հանձնեց 2015 թվականին ՀԳՄ գործունեությունը պարբերաբար լուսաբանած զանգվածային լրատվամիջոցներին, այդ թվում նաև՝ «Առավոտ» օրաթերթին:
Կարդացեք նաև
Սիրանուշ ՀԱՅՐԱՊԵՏՅԱՆ
