«Մոսկվա» կինոթատրոնում այսօր «Լեդին ֆուրգոնում» ֆիլմի ցուցադրությամբ մեկնարկեց Բրիտանական ֆիլմերի 14-րդ փառատոնը, որը ներկայացնում է բրիտանական ժամանակակից կինոարվեստի լավագույն և տպավորիչ աշխատանքները՝ կատակերգությունից և հոգեբանական թրիլլերից մինչև փաստագրական դրամա: ՀՀ-ում Միացյալ Թագավորության դեսպան Ջուդիթ Ֆարնուորթը լրագրողներին ասաց, որ Մեծ Բրիտանիա-Հայաստան գործակցության մեջ շատ կարեւոր են նման մշակութային միջոցառումները. «Այս փառատոնի համար Բրիտանական խորհուրդը հիանալի ֆիլմեր է ընտրել: Հուսով եմ՝ շատերը կդիտեն: Կարծում եմ՝ այդ ֆիլմերը մտածելու տեղիք եւ աշխարհին այլ տեսանկյունից նայելու հնարավորություն կտան»:
Մշակույթի փոխնախարար Ներսես Տեր Վարդանյանն էլ նկատեց, որ բրիտանական ֆիլմերի ֆոնդը բավականին մեծ եւ հարուստ է. «Անգլիացիները ֆիլմեր նկարահանելու մեծ տաղանդ ունեն: Փառատոնից փառատոն շարունակաբար նոր բացահայտումներ ես անում»:
Փետրվարի 27-ին էլ Փոքր թատրոնում կցուցադրվեն «Մաքսին Փիքի Համլետը» և «Սիրիայի թագուհիները» ֆիլմերը: Մայրաքաղաքում ֆիլմերի ցուցադրությունից հետո փառատոնը կշրջի մարզերում: Ֆիլմերը կներկայացվեն Ապարանում, Դիլիջանում և Ալավերդիում: Նաեւ կկազմակերպվեն «Լավագույն գրախոսականի», Best Friends և #BestofBritish մրցույթները:
Կարդացեք նաև
Ի դեպ, Բրիտանական ֆիլմերի փառատոնի բոլոր դահլիճները մատչելի են սայլակ օգտագործող անձանց համար:
Լուիզա ՍՈՒՔԻԱՍՅԱՆ
