Աշխարհահռչակ դաշնակահար, գյումրեցի Տիգրան Համասյանն, այսօր բարեգործական համերգ տալով Գյումրու Սավոյան փողոցի տնակներից մեկի բակում, ասաց. «Ամոթ է, որ այս մարդիկ արդեն 30 տարի տնակներում են ապրում»: Գյումրիում ծնված ու երկրաշարժի պատկերը տեսած երիտասարդը նշեց, որ իր ծնողներն այնպես են արել, որ երկրաշարժի բարդ տարիները վատ չանդրադառնան իր մանկության վրա:
Երաժիշտը հույս ունի, որ բարեգործական համերգը կօգնի 13 անօթեւան ընտանիքների համար անհրաժեշտ գումար հավաքելու ու բնակարաններ գնելու: Տիգրան Համասյանը կարծում է, որ իր համերգից հետո իշխանություններ կսկսեն մի քիչ ուշադրություն դարձնել անօթեւանության խնդրին ու թեեւ ուշ է, բայց ավելի լավ է ուշ, քան երբեք: Նա թեեւ իր ծննդավայրից հեռանալուց հետո այցելել է Գյումրիի տնակները, տեսել է մարդկանց ահավոր վիճակը, սակայն ասում է՝ «ժամանակը չէր հերիքում ինչ-որ բան արվեր իր կողմից»: Իսկ Գեղեցիկ տատիկի տնակը, որի բակում այսօր համերգ տվեց, Տիգրան Համասյանի մոտ ահավոր զգացողություն է առաջացրել, նրա բնութագրմամբ՝ ամոթի զգացողություն:
Կարդացեք նաև
Նշենք, որ Տիգրան Համասյանի համերգից հետո նրան պարգեւատրեցին Գյումրու քաղաքապետի ոսկե մեդալով: Քաղաքային իշխանությունները շնորհակալություն հայտնեցին նրան, որ կա: Իսկ տնակի բակում տեղադրված նրա համերգաբեմում տեղադրվեց արկղ, որտեղ պիտի հանգանակվեր 13 անօթեւան ընտանիքի համար հավաքվող անհրաժեշտ գումարը: Արկղն արագ լցվում էր գումարով:
Նունե ԱՐԵՎՇԱՏՅԱՆ
