Սյունիքի մարզի ընդհանուր իրավասության դատարանի դատավոր Իգնատ Բեգլարյանի անցյալ տարվա դեկտեմբերի 16-ի որոշմամբ՝ Տիգրան Կարապետյանի կողմից ներկայացված հայցադիմումը Վոլոդյա Հովհաննիսյանի եւ երրորդ անձ ճանաչված «Առավոտ» օրաթերթի դեմ՝ դատաքննության փուլ է տեղափոխվել:
Հայցվորը՝ Գորիսի նախկին քաղաքապետը, դիմել է դատարան՝ «Վիրավորանք հասցնելու համար լրատվության նույն միջոցով հրապարակային ներողություն խնդրելու, զրպարտություն համարվող փաստացի տվյալները լրատվության նույն միջոցով հերքելու եւ փոխհատուցում վճարելու մասին» պահանջով: Ըստ հայցվորի, վիճահարույց հրապարակումը «Սուրիկ Խաչատրյանին սպառնում են» հոդվածն է, որը լույս է տեսել www.aravot.am-ում անցյալ տարվա մայիսի 12-ին: Պատասխանողը Սյունիքի մարզպետ Սուրիկ Խաչատրյանի խորհրդականն է, Արցախյան ազատամարտի պահեստազորի գնդապետ: Սիսիանում դատական նիստը նշանակվել է ապրիլի 5-ին, ժամը 14.30-ին: Դատարանը ծանուցագիր է ուղարկել նաեւ հրապարակման հեղինակին՝ լրագրող Տաթեւ Հարությունյանին, որպես վկա դատակոչելու մասին:
Մեկ այլ ծանուցում էլ ստացվել է Շիրակի մարզի ընդհանուր իրավասության դատարանից, ուր դեռ անցյալ տարվանից ընթանում էին դատապարտյալ Հարություն Սարգսյանի հայցով նախնական դատական նիստերն ընդդեմ «Առավոտ» օրաթերթի, նախկին քաղաքապետ Վարդան Ղուկասյանի գրասենյակի, «Պանորամա. ամ»- ի: Անցյալ տարվա հուլիսի 10-ին aravot.am-ում տպագրվել է «Վարդան Ղուկասյանի գրասենյակի հայտարարությունը» խորագրի ներքո դատարանում վիճարկվող հայտարարությունը: Դատական նիստը նշանակվել է մարտի 31-ին, ժամը 14. 20-ին, Գյումրիում:
Կենտրոն եւ Նորք-Մարաշ վարչական շրջանների ընդհանուր իրավասության դատարանի վարույթում է գտնվում «Մ.Գեւորգյան» ՍՊ ընկերությունն ընդդեմ «Առավոտ» օրաթերթի եւ լրագրող Նելլի Բաբայանի՝ «ընկերության գործարար համբավն արատավորող վիրավորանքի եւ զրպարտության դիմաց» փոխհատուցման գումարներ բռնագանձելու մասին գործը: Այս գործով էլ դատարանը նիստը նշանակել է ապրիլի 14-ին, ժամը 15.00-ին, Թբիլիսյան խճուղու վրա գտնվող դատարանում:
Կենտրոնի դատարանում ունենք որդեգրման գաղտնիքին առնչվող եւս մեկ հայցադիմում:
Կարդացեք նաև
ՌՈՒԶԱՆ ՄԻՆԱՍՅԱՆ
«Առավոտ» օրաթերթ
27.02.2016
