«Հայ Ազգային Կոնգրեսն այն ուժն է, որն ինքնաբավ է: Մենք ինքներս ենք որոշում ում հետ աջակցություն փնտրել, կոնսոլիդացիա իրականացնել եւ ինչ կերպ: Դառը փորձ ունենք էլի, որ շատ համագործակցությունը չէ, որ միշտ լավ է»,- այս մասին, անդրադառնալով միավորվելու «Հայկական վերածնունդ միավորում» կուսակցության նախագահ Արթուր Բաղդասարյանի առաջարկին, «Բլից ինֆո» մամուլի ակումբում լրագրողների հետ հանդիպմանն ասաց ԱԺ ՀԱԿ խմբակցության քարտուղար Արամ Մանուկյանը:
Նա նշեց, որ համագործակցության լայն եզրեր են փնտրում նոր Ընտրական օրենսգրքի քննարկումների հետ կապված. «Մենք շատ բաց եւ ոչ ամբիցիոզ ենք այս հարցում: Մեզ ամենեւին պետք չէ ասել, որ դա մենք ենք արել: Փորձում ենք Ընտրական օրենսգրքի մի պլատֆորմ ստեղծել եւ ԲՀԿ-ի, եւ ՕԵԿ-ի, եւ «Ժառանգության», եւ բոլոր անկախ պատգամավորների հետ: Խնդիրը լավ օրենքի նախագիծ ունենալն է»:
Արամ Մանուկյանը հայտարարեց, որ այս հարցում իրենք ՕԵԿ-ի հետ խնդիր չունեն. «Իրենք էլ են համաձայն օրենքի լավ նախագիծ ունենալու հետ եւ մեր առաջարկներն իրենց համար լիովին ընդունելի են: Իսկ քաղաքական առումով դեռեւս համարում է, որ շուտ է այդ կարգի նախընտրական բլոկների մասին խոսել: Մենք 100%-ով վստահելի գործընկերներ ենք ընտրելու: Քաղաքական հարցերում ավելի բծախնդիր ենք լինելու»:
ՀԱԿ խմբակցության քարտուղարը կարծում է, որ Ընտրական օրենսգրքի հետ կապված իրենց կարծիքներն իշխանությունները հաշվի կառնեն, եթե ժողովուրդը փողոց դուրս գա. «Եթե ոչ, իհարկե հաշվի չի առնի»:
Կարդացեք նաև
Աշոտ ԻՍՐԱԵԼՅԱՆ
