«Լեռնային Ղարաբաղի հակամարտության խաղաղ ճանապարհով լուծումը Եվրոպական միության առաջնահերթություններից է: Ստատուս քվոն անընդունելի է մեզ համար: Հակամարտությունը ռազմական լուծում չունի եւ պետք է լուծվի քաղաքական ճանապարհով՝ միջազգային իրավունքի նորմերին համապատասխան»,- այս մասին ՀՀ արտաքին գործերի նախարար Էդվարդ Նալբանդյանի հետ համատեղ մամուլի ասուլիսի ընթացքում հայտարարեց ԵՄ միասնական արտաքին քաղաքականության և անվտանգության հարցերով բարձր ներկայացուցիչ, Եվրոպական հանձնաժողովի փոխնախագահ Ֆեդերիկա Մոգերինին:
Նա ասաց, որ Եվրոպական միությունը սատարում է հակամարտությունը լուծելու ուղղությամբ, Մադրիդյան երեք սկզբունքների հիման վրա, ԵԱՀԿ Մինսկի խմբի համանախագահների ներդրած ջանքերին. «Կոչ ենք անում ինտենսիվացնել բարձր մակարդակի երկխոսությունները»:
Մոգերինին կոչ արեց վերջ տալ շփման գծում իրավիճակի սրման փորձերին, առճակատման հռետորաբանությանը եւ հավատարիմ մնալ խաղաղ բանակցային գործընթացին. «Եվրոպական միությունը սատարում է միջադեպերի հետաքննման մեխանիզմի ստեղծման վերաբերյալ համանախագահների առաջարկը: Մենք կշարունակենք ավելացնել ՄԽ համանախագահներին ցուցաբերվող աջակցությունը»:
Աշոտ ԻՍՐԱԵԼՅԱՆ
