Պարզվում է՝ Ադրբեջանի օգտին լրտեսելու մեջ մեղադրվող Կարինե Ղումաշյանը փորձել է Պաշտպանության բանակի մասին տեղեկություններ ստանալ իր որդուց՝ Տիգրան Կարապետյանից, որը Արցախի զորամասերից մեկի լեյտենանտ է:
Այսօր Կենտրոն եւ Նորք-Մարաշ վարչական շրջանների ընդհանուր իրավասության դատարանում շարունակվեց Թուրքիայում բնակվող 4 հայերի՝ Ռաֆիկ Պապոյանի, Կարինե Ղումաշյանի, Սերգեյ Պապոյանի եւ Դիանա Գորոյանի գործով դատական նիստը: Նրանք մեղադրվում են Ադրբեջանի հետախուզական ծառայություններին հավաքագրվելու մեջ:
Այս գործով այսօր երկու վկա՝ Կարինե Ղումաշյանի երկու որդիները պետք է հարցաքննվեին, բայց նրանք հրաժարվեցին ցուցմունք տալուց՝ օգտվելով սահմանադրական իրենց իրավունքից՝ ազգականի դեմ ցուցմունք տալուց հրաժարվելու վերաբերյալ: Հրապարակվեցին նրանց նախաքննական ցուցմունքները: Ի դեպ, վկաները դատարանում հայտարարեցին, որ նախաքննության ժամանակ քննիչն իրենց չէր հայտնել ցուցմունք տալուց հրաժարվելու իրենց իրավունքի մասին:
Այն, որ Կարինե Ղումաշյանը փորձել է ՊԲ-ի մասին տեղեկություններ հավաքել որդուց` Տիգրան Կարապետյանից, ամրագրված էր հենց Տիգրանի նախաքննական ցուցմունքում: Ըստ ցուցմունքի, Կարինե Ղումաշյանը Թուրքիայում աշխատելիս է եղել կոշիկի ֆաբրիկայում ու որդու հետ համացանցով կենցաղային հարցերի շուրջ է հիմնականում շփվել. «Հարցրել է իմ զորամասի գտնվելու վայրը` ուչեբկա է, թե տանկային, ես պատասխանեցի, որ Խոջալուում է, հրաձգային վաշտ է»: Հետագայում Կարինեն Թուրքիայից եկել է Հայաստան, այցելել որդու զորամաս ու պատմել որդուն, որ ֆրանսիացի մի բարերար ցանկանում է հայոց բանակին օգնել, բայց իր բարեգործությունն իրականացնելու համար անհրաժեշտ են բանակի մասին տեղեկություններ: Տիգրանը շատ ուշ է իմացել, որ ֆրանսիացի բարերար գոյություն չունի, նախազգուշացրել է մորը` հեռու մնալ նմանատիպ գործերից:
Կարդացեք նաև
Արփինե ՍԻՄՈՆՅԱՆ
