Պարզվում է՝ ԱԺ պատգամավոր Սամվել Ալեքսանյանին պատկանող ընկերությանը՝ «Ալեքս Գրիգին», դատի է տվել օֆշորում գրանցված միանգամից երկու ընկերություն:
Հիշեցնենք, որ նախորդ անգամ տեղեկացրել էինք, որ Պառլամենտ Դիստրիբյուշն» ընկերությունն ընդդեմ «Ալեքս գրիգ» եւ «Ա եւ Գ» ընկերությունների գործը Մալաթիա-Սեբաստիա վարչական շրջանների ընդհանուր իրավասության դատարանում է:
«Պառլամենտ Դիստրիբյուշն» ընկերության ներկայացուցիչները պնդում են, որ իրենց ապրանքանիշը «Ա եւ Գ» ընկերությունն անօրինական ճանապարհով օգտագործում է ու այդ ապրանքային նշանով օղիներ արտադրում: Իսկ ԱԺ պատգամավոր Սամվել Ալեքսանյանին պատկանող «Ալեքս գրիգ» ընկերությունն էլ իրացնում է այդ օղիները: «Պառլամենտ Դիստրիբյուշնը» պահանջում է չարտադրել ու չիրացնել իրենց ապրանքանիշով օղիներ:
Նույն դատարանում «Ալեքս Գրիգի» եւ «Ա եւ Գ» ընկերության դեմ մեկ այլ գործ էլ է քննվում, այս անգամ «Վլակտոր Թրեյդինգ Լիմիթեդ» ընկերությունն է դատի տվել «Ալեքս Գրիգին» եւ «Ա եւ Գ» ընկերություններին: «Ալեքս Գրիգի» ներկայացուցիչ, փաստաբան Լեռնիկ Հովհաննիսյանի տեղեկություններով, իրենց դատի տված երկու ընկերությունն էլ օֆշորում գրանցված անհայտ ծագման ընկերություններ են:
Կարդացեք նաև
«Վլակտոր Թրեյդինգ Լիմիթեդի» ներկայացուցիչները պնդում են, «Զելյոնայա մետկա» օղու շշի ձևավորումը շփոթության աստիճան նման է իրենց արտադրած «Զելյոնայա մարկա» օղու շշին, և պահանջում էին արգելել ընկերությանը շարունակել նման ապրանքանիշով արտադրությունը։
Իսկ «Երևան Սիթի» սուպերմարկետները ներկայացնող «Ալեքս Գրիգ» ընկերությունից էլ պահանջում են դադարեցնել այդ օղիների վաճառքը:
Այսօր հայցվոր կողմը, ըստ «Ալեքս Գրիգ» ընկերության փաստաբան Լեռնիկ Հովհաննիսյանի հստակեցրել է իր դիրքորոշումն ու պահանջը, եւ դատական նիստը հետաձգվել է մինչեւ ապրիլ:
Պարոն Հովհաննիսյանը կրկնեց իր ավելի վաղ հայտնած տեսակետը, որ հարկ չկար դատի տալ ընկերություններին, եթե կարելի էր արտադատական կարգով խնդիրը լուծել: Փաստաբանը դեռ այն համոզմանն է, որ դրսից պատվեր է իրականացվում ընդդեմ գործարար Սամվել Ալեքսանյանի:
Արփինե ՍԻՄՈՆՅԱՆ