«Քյավառի քյուֆթան» շատերիս սիրելի ուտեստներից է, եւ ընդունված է մատուցել տոնական սեղաններին՝ սնկով եփված հաճարով փլավի հետ: Քյուֆթան կարելի է մատուցել նաեւ ոչ թե եփված վիճակում, այլ՝ ջեռեփ: Փորձեք ավանդական քյուֆթայի այս տարբերակը, եւ այն կդառնա ձեր սեղանի զարդերից:
Անհրաժեշտ մթերքները
Քյուֆթա- 1 կգ
Գլուխ սոխ- 1 հատ միջին՝ քյուֆթայի մեջ գցելու համար եւ 1 հատ խոշոր` սնկի հետ տապակելու համար
Կարդացեք նաև
Կաթ- 150 մլ ՝ ¾ բաժակ
Օղի կամ կոնյակ- 1 ճաշի գդալ
Սունկ- 0,5 կգ
Դեղին պանիր- 100 գրամ
Բուսական յուղ- 2 ճաշի գդալ
Աղ, սեւ պղպեղ- ըստ ճաշակի
Պատրաստման եղանակը
Գնեք թարմ եւ լավորակ, առանց ջլերի քյուֆթա՝ պատրաստի ծեծած միս: Լցրեք այն խորը ամանի մեջ: Վրան ավելացրեք խորանարդաձեւ, բայց ոչ շատ մանր կտրատված սոխը, կաթը, օղին: Սկզբում պարզապես խառնեք, ապա սկսեք ձեռքով «ծեծել» քյուֆթան. «ապտակեք» այնպես, որ ձեր ձեռքը մտնի քյուֆթայի մեջ՝ մինչեւ ամանի հատակը եւ այդպես խառնի քյուֆթան: Ընթացքում կզգաք, թե որքան է «թեթեւանում» միսը՝ ձեր ապտակների շնորհիվ մեջը լցված օդի շնորհիվ: Քյուֆթայի ծեծը շարունակեք մոտ 15 րոպե:
Դրանից հետո պատրաստեք սնկով սոխառածը: Թավայի մեջ տաքացրեք բուսական յուղը, մեջը լցրեք երկար-բարակ կտրատած սոխը: Մարմանդ կրակի վրա սոխը տապակեք՝ պարբերաբար խառնելով, որպեսզի չվառվի, ապա ավելացրեք տաշեղաձեւ կտրատած սունկը: Աղ եւ պղպեղ արեք: 10 րոպե տապակելուց հետո անջատեք:
Ջեռոցի թավայի հատակին կարագ քսեք: Ծեծված քյուֆթան հավասար տարածեք թավայով մեկ: Վրան լցրեք սնկով սոխառածը, դրա վրա էլ՝ քերած դեղին պանիրը: Դրեք նախապես 200 աստիճան տաքացրած ջեռոցը: 40 րոպե անց ստուգեք քյուֆթայի պատրաստվածության աստիճանը՝ դանակով կամ փայտիկով ծակեք, եթե մեջը սպիտակ է, ուրեմն պատրաստ է: Նկատի ունեցեք, որ ջեռոցում եփվելու ընթացքում քյուֆթան ծավալը կորցնելու է:
Մատուցեք սնկով եփված հաճարով փլավի հետ: Ի դեպ, կարող եք հաճարով փլավի մեջ ոչ թե պարզապես խաշած սունկ լցնել, այլ ճիշտ նույնպիսի սոխառածով պատրաստված սունկ, ինչպիսին լցրեցիք քյուֆթայի վրա: Շատ ավելի համեղ կլինի:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
«Առավոտ»
5.03.2016
«ծեծել»… «ապտակել»… մե՛ղք է, սա խեղճ քյուֆթան
դեռ յետոյ ալ կրակի վրայ զետեղել, ապա՝ ծամել, ուտել
այս ինչ դաժան ճակատագիր…