Հանգստյան օրերին ղարաբաղա-ադրբեջանական շփման գծում հակառակորդը, տարբեր տրամաչափի հրաձգային զինատեսակներից, հայ դիրքապահների ուղղությամբ արձակել է ավելի քան 1200 կրակոց: Բացի վերոնշյալից, շփման գծի հարավային ուղղությամբ ադրբեջանական զինուժը կիրառել է 60 միլիմետրանոց ականանետ (2 արկ):
Ըստ ռազմական փորձագետ Կարեն Վրթանեսյանի, ադրբեջանական կողմից նկատվում է իրավիճակը կրկին սրելու փորձ. «Զինված ուժերի պաշտոնական ներկայացուցիչները շեշտել են, որ թշնամին փորձում է հրահրել: Սկզբում նյութ դրեցին, որ իբր հայկական կողմը դիվերսիայի փորձ է արել, լուսանկար հրապարակեցին, հայկական կողմը մեկնաբանեց, դա փաստացի ամեն ինչ հանգիստ է, պարզապես ադրբեջանցիները փորձում են տպավորություն ստեղծել, որ հայկական կողմից ինչ-որ բան է եղել: Դրանից հետո տեսանյութ տարածեցին բեռնատարների ականանետերից ռմբակոծման վերաբերյալ` պնդելով, որ հայկական կողմն է արել, հայկական կողմը չհերքեց, բայց շեշտեց, որ կորուստներ չունենք: Իրավիճակի սրման ու սրումը շարունակելու ապացույցներն ունենք, թե ինչն է պատճառը, դժվար է ասել, կարող է ինչ-որ լոկալ, փոքր իրադարձություններ են եղել, որից տեղյակ չենք»:
Կարեն Վրթանեսյանի խոսքով, արտառոց իրավիճակ չկա. «Նախորդ շաբաթների համեմատ փորձում են սրել իրավիճակը, բայց նմանատիպ բաներ անցած տարի էլ եղան, նոր բան չէ մեզ համար»:
Արփինե ՍԻՄՈՆՅԱՆ
