2015թ. դեկտեմբերի 6-ին սահմանադրական բարեփոխումների հանրաքվեի ժամանակ Տերյան փողոցի 42/1 հասցեում տեղակայված թիվ 10/23 ընտրատեղամասի հանձնաժողովի անդամ Արմեն Մարալյանն իր լիազորությունների իրականացման ընթացքում գրանցամատյանի 36-րդ էջի 1657 և 1658 հերթական համարների դիմաց գրանցված Զարուհի Մուրադյանի և վերջինիս որդու Արա Ճաղարյանի փոխարեն վերջիններիս անվան դիմաց կեղծ տվյալներ լրացնելով, այն է 1658 հերթական համարի դիմաց գոյություն չունեցող անձնագրային տվյալներ և 1657 հերթական համարի դիմաց անձնագրային տվյալներ լրացնելով և դրանց դիմաց անձամբ ստորագրելով՝ չպարզված հանգամանքներում քվեարկել է վերջիններիս փոխարեն:
Այսօր Կենտրոն եւ Նորք Մարաշ վարչական շրջանների ընդհանուր իրավասության դատարանը որոշեց տուգանել Մարալյանին հինգ հարյուր հազար դրամով՝ չնայած մեղադրող դատախազը միջնորդեց տուգանել վեց հարյուր հազար դրամով: Որպես վերջին խոսք Արմեն Մարալյանը խնդրեց մեղմ վերաբերվել իրեն՝ խոստանալով, որ նման բան այլեւս չի կրկնվի:
Ի դեպ, խոստովանելով իր կատարած օրինախախտությունը, Մարալյանը միջնորդեց արագացված կարգով քննել գործը:
Արփինե ՍԻՄՈՆՅԱՆ
Կարդացեք նաև
