Ինչպես տեղեկացրել ենք, մի քանի օր առաջ Գյումրու ավագանու նախկին անդամ Չուբար Զարգարյանին պատկանող «Ուրարտու» ռեստորանի մոտ հնչել էին կրակոցներ: Որպես մասնակիցներ նշվում էր Չուբար Զարգարյանի եղբորորդու ու Շառլ Ազնավուրի հրապարակում գտնվող «Բյուզարդ» ռեստորանի տիրոջ՝ Տիգրան Փանոսյանի («Կռուգի Մստի») անունները: Վերջինս ավագանու անդամ է: Խոսակցություններ էին շրջանառվում այն մասին, որ նրանց միջեւ վիճաբանություն է ծագել աղջկա պատճառով. Զարգարյանի եղբորորդին սիրահետել է Տիգրան Փանոսյանի դստերը, որը դուր չի եկել հորը:
Ոստիկանությունից Aravot.am-ին տեղեկացրեցին, որ Գյումրու ավագանու անդամ Տիգրան Բյուզանդի Փանոսյանը, իր անձնական օգտագործման «Ֆորդ Էքսպլորեր» մակնիշի սպիտակ մեքենայով Խանջյան 31 հասցեի դիմաց հարվածել է «Մերսեդես Բենց» մակնիշի ավտոմեքենային, այնուհետ հարվածել է «Վազ 21-07» ավտոմեքենային, իսկ վերջում հարվածել է այն սպիտակ «Լեքսուզ»-ին, որը ոստիկանությունը հայտնաբերել էր դեպքի վայրից քիչ հեռու՝ անիվը պայթած վիճակում:
Այսպես ասած, մեքենաների ջարդի ընթացքում 25-ամյա Անդրանիկ Աշոտ Ղազարյանը՝ (Խրիմյան Հայրիկ փողոցի շենքերից մեկի բնակիչ է), որը Չուբար Զարգարյանի եղբորորդու ընկերն է, ինքնաձիգից մի քանի կրակոցներ է արձակել: Ոստիկանության բացատրական աշխատանքների շնորհիվ այսօր Անդրանիկ Աշոտ Ղազարյանը ներկայացել է ոստիկանության «Կումայրի» բաժին ու ներկայացրել է ինքնաձիգը, որից կրակոցներ է արձակել:
Նունե ԱՐԵՎՇԱՏՅԱՆ
