Պաշտպանության նախկին փոխնախարար, անազատության մեջ գտնվող Վահան Շիրխանյանն ամենաուշը վաղը առավոտյան կվիրահատվի:
Նրա պաշտպան՝ փաստաբան Ստեփան Ոսկանյանը, Aravot.am-ին հայտնեց, որ այսօր իրենց հաջողվեց կազմակերպել Վահան Շիրխանյանի տեղափոխումը Վլադիմիր Ավագյանի անվան բժշկական կենտրոն, որտեղ իրականացվեց վերջինիս հետազոտությունը. «Արձանագրվեց, որ նրա ձախ ոտքի ստորին վերջույթի հատվածի երակում, ի դեպ, այն հատվածում, որը նախկինում վիրահատության էր ենթարկվել՝ տրոմբ կա:
Հատկանշական է, որ նախկինում քրեակատարողական հիմնարկի կողմից իրականացված դուպլեքս հետազոտության արդյունքում այդ հանգամանքը չէր հայտնաբերվել: Կամ միտումնավոր կամ այլ պատճառներով ձախ ոտքի հատվածում չէր բացահայտվել տրոմբի հանգամանքը:
Բուժզննման արդյունքում բժիշկների տված եզրակացության համաձայն՝ պետք է անհապաղ Վահան Շիրխանյանին տեղափոխել բժշկական կենտրոն եւ կատարել վիրահատություն: Նրան պետք է տեղափոխեն հիվանդանոց այսօր կամ վաղը առավոտյան»:
Կարդացեք նաև
Հիշեցնենք, որ Վահան Շիրխանյանը բուժզննում պետք է անցներ դեռ երեկ, բայց բժշկին չէին թույլատրել այցելել Շիրխանյանին:
Հիշեցնենք նաեւ, որ Վահան Շիրխանյանը կասկածվում է` Արթուր Վարդանյանի կողմից ստեղծված հանցավոր համագործակցությանը մասնակցելու, դրա օգտին գործելու, կոնկրետ հանձնառություն եւ դերակատարություն ունենալու մեջ, նախատեսված` ՀՀ քրեական օրենսգրքի 223-րդ հոդվածի 2-րդ մասով:
Արփինե ՍԻՄՈՆՅԱՆ
