Տավուշի մարզում խաղող ընդունող, վերամշակող ընկերություններից միայն «Իջեւանի գինու, կոնյակի գործարան» ՓԲԸ-ն է, որ պարտք է սահմանամերձ մարզի խաղողագործներին: Մեր տեղեկություններով՝ այդ գործարանը սկսած 2010 թվականից, ուշացրել է մթերված հումքի դիմաց վճարումները:
Տավուշի մարզպետարանի աշխատակազմի գյուղատնտեսության եւ բնապահպանության վարչության պետ Վաղարշակ Սուքոյանն ասաց, որ Իջեւանի գինու, կոնյակի գործարանը մարզի խաղողագործների հետ կնքված պայմանագրեր ունի, որոնցով հաստատված ժամանակացույցով վճարում է կես տարի առաջ մթերված խաղողի դիմաց:
Ըստ Վ. Սուքոյանի ՝ այդ վճարումները կկատարվեն մինչեւ ապրիլի 1-ը: Մարզպետարանի գյուղատնտեսության եւ բնապահպանության վարչության պետը տեղյակ չէր,թե գործարանն ինչքա՞ն գումար է պարտք Իջեւանի եւ Բերդի տարածաշրջանների խաղողագործներին: Զանգահարեցինք Իջեւանի գինու, կոնյակի գործարանի տնօրեն Ատոմ Եգորյանի բջջային հեռախոսահամարին: Նրան հարցրինք, թե ինչքա՞ն գումար են պարտք Տավուշի մարզի խաղողագործներին: Եգորյանն ասաց, թե այդ մասին մեկ այլ լրատվամիջոցի ինքը հարցազրույց է տվել, եւ այդ թեմայով այլեւս չի ցանկանում լրագրողներին տեղեկատվություն տալ:
Նայեցինք Իջեւանի գինու գործարանի ինտերնետային կայքը, ուր տեղեկություններ կային գործարանի պատմության արտադրանքի,առաքման շուկաների, բայց ոչ՝ խաղողագործներին ունեցած պարտքի մասին: Շքեղ, եռալեզու՝ հայերեն, ռուսերեն եւ անգլերեն կայքում գովազդային արտահայտություններ կան, օրինակ՝ «Իրավմամբ, Իջեւանի գինու գործարանը համարվում է Տավուշի մարզի դարպասը եւ իր անկրկնելի արտադրանքով աշխարհին է ներկայացնում Տավուշի մարզը եւ Հայաստան աշխարհը»:
Կարդացեք նաև
Իջեւանն իր աշխարհագրական դիրքով Տավուշի մարզի կենտրոնում է եւ չի կարող մարզի դարպասը հանդիսանալ: Գինու գործարանը գտնվում է Իջեւանի հարավային մուտքին: Եթե գործարանի շենքի ճակատին մի քանի էլեկտրական լամպ տեղադրվեր, գիշերները մարզկենտրոն Իջեւանի հարավային մուտքը՝ « Տավուշի մարզի դարպասը», խավարի մեջ չէր լինի:
Ոսկան ՍԱՐԳՍՅԱՆ
