ՀԱԿ խմբակցության ղեկավար Լեւոն Զուրաբյանն այն հարցի առնչությամբ, թե ինչպես են ընտրվելու այդ 4 ներկայացուցիչներն ընդդիմությունից, այն պարագայում, երբ միևնույն խմբակցությունում տարբեր քաղաքական ուժեր կան ներկայացված՝ հայտարարել է. «Մեր խմբակցության բոլոր անդամներին այդ ուղերձն ուզում եմ ուղարկել, նրանց ցանկացած հայացք մենք պատրաստ ենք ներկայացնել այդ ֆորմատում: Այսինքն մենք կներկայացնենք ոչ միայն խմբակցության դիրքորոշումը, այլ նաև առանձին ընդգրկված քաղաքական ուժերի դիրքորոշումները»:
Aravot.am-ը ՀԱԿ խմբակցության անդամ Նիկոլ Փաշինյանից հետաքրքրվեց, թե ինչպես է վերաբերվում այդ ուղերձին եւ արդյոք մտադի՞ր է նրա միջոցով ներկայացնել իր մոտեցումները:
Նիկոլ Փաշինյանը պատասխանեց. «Մենք ասել ենք, որ 4+4+4 ձեւաչափին մասնակցելու որեւէ հետաքրքրություն չունենք, հետեւաբար նշված ֆորմատում ներկայացված լինելու անհրաժեշտություն չունենք: Բայց եթե Հայ ազգային կոնգրես կուսակցության ներկայացուցիչներին շատ հարկավոր է նման ֆորմատում լինելը եւ դրա համար մեր արտոնության կամ թույլտվության կարիքը ունեն, մենք չենք զլանում, տալիս ենք այդ թույլտվությունը: Բայց սա չի նշանակում, թե մենք որեւէ մեկին պատվիրակում ենք մեր անունից կամ մեր փոխարեն խոսել: Մեր անունից մենք ինքներս կխոսենք, այնտեղ, որտեղ անհրաժեշտ կհամարենք, այնպես՝ ինչպես, անհրաժեշտ կհամարենք»:
Ամի ՉԻՉԱԿՅԱՆ
Կարդացեք նաև
