Ելենա Օվսյանիկովան ընդդեմ փոխոստիկանապետի, ոստիկանապետի խորհրդականի ու ԱԺ պատգամավոր Էդմոն Մարուքյանի հայցով դատաքննությունն այսօր շարունակվել է: Ելենա Օվսյանիկովան դատարանից պահանջում է պարտավորեցնել նշված անձանց հերքել իր պատիվն, արժանապատվությունն ու գործարար համբավն արատավորող տեղեկությունները: Նա նաեւ մի քանի միլիոն դրամի հասնող գումար է պահանջում՝ որպես բարոյական փոխհատուցում:
Հիշեցնենք, որ Երևանում բնակվող Ելենա Օվսյանիկովան մասնակցել է Բաղրամյան պողոտայում տեղի ունեցած Electric Yerevan ցույցերին, այդ ընթացքում ոստիկաններին կոչ արել զերծ մնալ ցուցարարների նկատմամբ բռնություն կիրառելուց: Ավելի ուշ ոստիկանապետի խորհրդականը Facebook-ում գրառում էր արել՝ Ելենային ներկայացնելով որպես «միջազգային մասշտաբի սադրիչ» ուկրաինուհի, որը, իբր, երեկոյան ալկոհոլի ազդեցության տակ անցել է Բաղրամյանը պատնեշած ոստիկանների շարքերով եւ հերթով նրանց սեռական հարաբերություններ առաջարկել:
Փոխոստիկանապետ Հունան Պողոսյանն էլ պահանջել էր, որ Օվսյանիկովան հեռանա տարածքից, որովհետև «իր ոստիկանները սեռապես անբավարարված են եւ գրգռվում են նրա ներկայությունից»:
Ըստ Ելենայի պաշտպան՝ փաստաբան Լուսինե Հակոբյանի, իր պաշտպանյալը ակցիայի օրը ոստիկանության ներկայացուցիչներին հորդորել է ուժ չկիրառել ակցիայի խաղաղ մասնակիցների նկատմամբ, իսկ արդյունքում փոխոստիկանապետը նրան անվանել է սադրիչ. «Իմ պաշտպանյալի գործողությունները սադրանք չեն, փոխոստիկանապետն ուղղակիորեն զրպարտել է հայցվորին: Նա նաեւ ասել է՝ մեր ոստիկանները սեռապես մտահոգված են, իսկ դուք նրանց առջեւ գնում, գալիս եք: Հունան Պողոսյանի այդ արտահայտությունը լսել են թե իմ պաշտպանյալը, թե նրա ընկերուհին, որն այդ պահին եղել է Ելենայի կողքին: Այդ արտահայտությունը լսել է առնվազն նաեւ պատգամավոր Թեւան Պողոսյանը, որն ավելի ուշ civilnet-ին տված հարցազրույցի ժամանակ ասել է, որ նման հայտարարություն արվել է….»:
Կարդացեք նաև
Փաստաբանը մեջբերեց նաեւ ոստիկանապետի խորհրդական Նարեկ Մալյանի դիտարկումները. «Նարեկ Մալյանը իմ պաշտպանյալի վերաբերյալ facebook-ում գրառում է արել, թե ոստիկանության սպաներից մեկը բարկացած հայհոյեց՝ ասելով, եթե մյուս անգամ մոտենա զորքին, զորքը սեքսուալ ֆանտազիան սիրով կիրականացնի, առավել եւս, որ տղաները դրա կարիքն ունեն»:
Անդրադառնալով Ելենա Օվսյանիկովայի վերաբերյալ ԱԺ պատգամավոր Էդմոն Մարուքյանի դիտարկումներին՝ փաստաբանը շարունակեց մեջբերումները: Մասնավորապես, ըստ նրա մեջբերման, պատգամավորը հայտարարել է, որ Ելենայից ուժեղ ալկոհոլի հոտ էր փչում, հետո շտապել է շտկել իր հայտարարությունը, թե միգուցե Ելենայի կողքին կանգնած անձի վրայից է ալկոհոլի հոտ փչել:
Փաստաբանը կրկին անդրադարձավ փոխոստիկանապետի ասածներին ու նշեց, որ. «Ընդամենը ոստիկանությունից պահանջվում էր ներկայացնել ապացույց, որ իր պահվածքով ու գործողություններով ոստիկանությանը իմ պաշտպանյալը դրդել է վատ արարքի, իսկ սադրանք բառը հենց վատ արարքի դրդել իմաստն ունի»:
Արփինե ՍԻՄՈՆՅԱՆ
