Երևանի Կոմիտասի անվան պետական կոնսերվատորիայում այսօր հյուրընկալվեց ՀԽՍՀ և ՌԴ վաստակավոր արտիստ, դաշնակահար Մարիա Ղամբարյանը: Վերջին օրերին նրա 90-ամյակի առթիվ մի շարք միջոցառումներ կազմակերպվեցին: Մարտի 29-ին էլ անվանի դաշնակահարը համերգ է ունեցել Արամ Խաչատրյանի տուն-թանգարանում:
Մարիա Ղամբարյանին կոնսերվատորիայի դահլիճում ողջունեցին դաշնամուրային կատարմամբ, ապա ուսանողներից մեկը կիթառով կատարեց «Տեր, ողորմեա»-ն:
Հյուրին շնորհվեց Կոնսերվատորիայի պատվավոր պրոֆեսորի կոչում: Հայաստանի երաժշտական ընկերության նախագահ Դավիթ Ղազարյանի որոշմամբ էլ` Մարիա Ղամբարյանին շնորհվեց միության «Կոմիտաս» մեդալ: «Երբ փոքր էի, հայրս մշտապես ինձ հիշեցնում էր, որ Երեւանն է իմ հայրենիքը: Մանկուց տոգորված եմ եղել այդ գաղափարով: Կյանքն այնպես դասավորվեց, որ ես մեկնեցի Մոսկվա, որն էլ դարձավ իմ երկրորդ հայրենիքը, բայց Երեւանը երբեք չեմ մոռացել եւ պարբերաբար այցելել եմ: Երբ Երեւան էի գալիս, համբուրում էի քաղաքի պատերը եւ ասում` իմ Երեւանը… Ես գզում եմ, որ սա է իմ հայրենիքը»,-ասաց տիկին Ղամբարյանը:
Կարդացեք նաև
Ի դեպ, 90 տարեկանում ակտիվ գործունեություն ծավալելու համար Մարիա Ղամբարյանն ընդգրկվել է Հայաստանի «Դյուցազնագրքում»: Համապատասխան վկայագիրը եւս ներկայացվեց հանդիպման ընթացքում, իսկ Ղամբարյանի անունը կգրանցվի «Գագիկ Ծառուկյան» հիմնադրամի աջակցությամբ լույս տեսնող գրքի առաջիկա հատորում:
Համաշխարհային բեմեր նվաճած դաշնակահարն առողջական խնդիրներից խուսափելու համար Գյումրի չի այցելել, սակայն Գյումրու Կարա-Մուրզայի անվան երաժշտական քոլեջից նրան ջերմագին բարեւներ էին ուղարկել` գաթայի հետ միասին (Լուսանկարում):
Լուիզա ՍՈՒՔԻԱՍՅԱՆ
