Անդրադառնալով Վերահսկիչ պալատի անցկացրած վերջին ուսումնասիրություններին, որտեղ դեղերի թանկ ձեռքբերման վերաբերյալ դիտարկումներ են եղել, առողջապահության նախարար Արմեն Մուրադյանը կառավարության նիստից հետո պատասխանելով լրագրողների հարցերին ասաց. «Բոլոր մեկնաբանությունները տրված են, կարծում եմ, որ այդպիսի լուրջ խնդիրներ չունենք»:
Արմեն Մուրադյանը նկատեց, որ նախարարության սկզբունքն այնպիսին է, որ դեղերը պետք է գնեն արտադրողից եւ երկարամյա պայմանագրով, քանի որ փորձը ցույց է տվել, որ նման սկզբունքի դեպքում կարողանում ենք անգամներով ավելի էժան եւ ավելի որակյալ դեղորայք ձեռք բերել:
Հարցին, թե մամուլում հրապարակումներ են եղել, որ մի շարք պոլիկլինիկաներում
մայրերին կաթնախառնուրդներ են առաջարկում այն ֆիրմաների, որոնք ԱԺ պատգամավոր Սամվել Ալեքսանյանին պատկանող ընկերությունն է ներկրում, արդյոք այդ հարցով նախարարությունը զբաղվել է, պարոն Մուրադյանն ասաց, որ բրենդային ընկերությունների վերաբերյալ հարցերին ինքը միայն գրավոր կպատասխանի, քանի որ պետք է հարցն ուսումնասիրվի. «Որեւիցե բրենդային խնդիր չէի ուզենա մեկնաբանել: Կառավարության այսօրվա որոշումով բոլոր հնարավոր սննդի տեսակները, փոխարինիչները կարգավորվելու են Առողջապահության նախարարության կողմից, որն արդեն կբացառի ոչ մասնագիտական պարզաբանումները»:
Կարդացեք նաև
Լուսինե ԲՈՒԴԱՂՅԱՆ
