Թեժ բանավեճ «4+4+4» ձեւաչափի քննարկման ժամանակ
Ընտրական օրենսգրքի նախագծի «4+4+4» ձեւաչափի բովանդակային քննարկումների առաջին հարցը ID-քարտերով ընտրություններին մասնակցության հարցն էր: Նախ` հստակեցնող հարց հնչեց քաղհասարակության ներկայացուցիչ Դանիել Իոաննիսյանի կողմից` ընտրողների ցուցակում պետք է լինեն միայն այն մարդիկ, որոնք ունեն ID, թե՞ ընդգրկված են լինելու բոլորը, բայց քվեարկելու իրավունք ունենալու են միայն ID քարտ ունեցողները:
«Եթե քվեարկության այն համակարգն է, որը նախատեսված է, դա ոչինչ չի նշանակում իրենց ցուցակում լինելը, որովհետև եթե չունեն նույնականացման քարտ, չեն կարողանալու քվեարկել»,- պարզաբանեց ԸՕ-ի նախագծի հեղինակներից Հրայր Թովմասյանը:
ԲՀԿ նախագահ Նաիրա Զոհրաբյանն էլ հետաքրքրվեց`ի՞նչ ճակատագիր է սպասվում ընտրություններից մեկ օր առաջ Հայաստան ժամանած քաղաքացուն:
Կարդացեք նաև
Կառավարության աշխատակազմի ղեկավար- նախարար Դավիթ Հարությունյանը հստակեցրեց` ID քարտին չտիրապետող անձը չի կարող քվեարկել: Ընտրողների ռեգիստրում լինել-չլինելը բնավ էական չի, քանի որ չի կարողանալու քվեարկել:
Նա նաեւ ասաց, որ իր համար բավական տարօրինակ է այն, որ տվյալ հարցի վերաբերյալ անցած քննարկման ժամանակ կողմերը միասնական դիրքորոշում չեն ունեցել, յուրաքանչյուրն իր կարծիքն է հրապարակել:
Դավիթ Հարությունյանը նկատեց, որ նախորդ նիստին ժամանակ էլ այս հարցի վերաբերյալ միասնական դիրքորոշում չկար եւ հետաքրքրվեց` եկե՞լ են միասնական դիրքորոշման. «Մենք կողմնակից կլինենք, եթե դա տեխնիկապես հնարավոր լինի, դա թանկ հաճույք է և ճիշտ կլինի, որ մենք բոլոր քաղաքական ուժերով համատեղ դիմենք դոնոր հասարակությանը. այդ պահին պարզվեց որ ձեր թիմում չկա միասնական կարծիք, մի մասը կողմ է, մի մասը՝ դեմ»: Պատասխան չհնչեց:
Լևոն Զուրաբյանը հստակեցրեց ՀԱԿ-ի դիրքորոշումը. «Մենք ոչ թե դեմ ենք նույնականացման քարտերին, միասնական փաստաթղթով քվեարկությանը, մենք դեմ ենք ցանկացած էլեկտրոնային համակարգի ներմուծմանը ընտրական գործընթացներում»: ՀԱԿ-ում նման դիրքորոշումը բացատրում են ընտրակեղծիքների նոր` էլեկտրոնային մեխանիզմի «ներդրմամբ»: Մասնագետներն իրենց բացատրել են, որ լուրջ եւ վստահելի էլեկտրոնային համակարգեր հնարավոր է ներդնել երեք տարում:
Հրայր Թովմասյանը կոչ արեց Գրիմերին մեկնաբանել ամբողջական, «որովհետև դա լոկոլ փոքրիկ սարք է, դրա համար երեք տարի պետք չէ»:
ԲՀԿ-ն կողմ է, որ միանման քվեարկության փաստաթուղթ լինի:
«Քննարկումները մտել են անհասկանալի փուլ, ով ինչ մտածում ասում է, միասնական կարծիք չկա»,-դիտարկում հայտնեց Դավիթ Հարությունյանը` արձագանքելով Լեւոն Բարսեղյանին, որը դեմ էր նույնականացման քարտերով քվեարկությանը: Նա հորդորեց հիմք ընդունել այն, որ էլեկտրոնային սարքերը գրանցման համար են, քվեարկության համար չեն, եւ դրանք չեն փոխարինելու անձնագրի կամ որեւէ բանի, դրանք ի լրումն են:
Այս ողջ ընթացքում ՀՅԴ-ական Աղվան Վարդանանը եւ Արմեն Ռուստամյանը հորդորում էին`«բանը մի անգամ ասել»: Արմեն Ռուստամյանն առաջարկեց անգամ քննարկման ժամկետ սահմանել: ՀԱԿ-ից Արամ Մանուկյանն էլ հորդորեց մանրուքների մեջ չմտնել, քննարկման ձեւաչափն ունի 5+1+1 առաջարկներ: Այս կոչերին միացավ ՀՀԿ-ական Հովհաննես Սահակյանը:
Ի վերջո, հաջողվեց անցնել հաջորդ` ցուցակների մաքրման հարցին: Արամ Մանուկյանը ներկայացրեց վրացական փորձը:
Մանրամասները`տեսանյութում:
«Ես կարող եմ թղթի վրա մի բան նկարել, բայց…»,- հեգնեց կառավարության աշխատակազմի ղեկավար-նախարար Դավիթ Հարությունյանը: «Ես նկարո՞ղ եմ, չեմ հասկանում, չի կարելի տենց, չի կարելի հեգնել»,- բորբոքվեց Արամ Մանուկյանը: Դավիթ Հարությունյանն ասաց, որ Արամ Մանուկյանը ստում է, երբ 105 տոկոսով կայացած ընտրությունների մասին է խոսում ու ընդհանրապես, իրեն անհայտ թվեր է ներկայացնում: «Ես նկարիչ եմ, շատ լավ նկարիչ եմ, բայց այստեղ վիճակագրական տվյալներ են ներկայացված: Ու մի հեգնեք»,- ասաց Արամ Մանուկյանը:
Նելլի ԳՐԻԳՈՐՅԱՆ
