Ղազախստանի Հանրապետության արտաքին գործերի նախարարությունը եւս հայտարարություն է տարածել՝ Լեռնային Ղարաբաղի հակամարտության վերաբերյալ: Այս մասին հաղորդում է eurasnews.ru-ը:
Հայտարարության մեջ մասնավորապես ասված է. «Ղազախստանի Հանրապետության արտաքին գործերի նախարարությունը ուշի ուշով հետեւում է Լեռնային Ղարաբաղի շուրջ տիրող իրավիճակին: Խորը մտահոգություն ենք հայտնում, որ հրադադարի ռեժիմի խախտման արդյունքում մարդկային զոհեր են եղել: Կողմերին կոչ ենք անում ցուցաբերել զսպվածություն եւ պահպանել հրադադարի ռեժիմը: Պաշտպանելով Լեռնային Ղարաբաղի կոնֆլիկտի լուծմանն ուղղված ԵԱՀԿ Մինսկի խմբի ջանքերը, վերահաստատում ենք մեր դիրքորոշումը, որ հակամարտությունը պետք է լուծվի բացառապես խաղաղ ճանապարհով: Ղազախստանի Հանրապետությունը հանդես է գալիս Լեռնային Ղարաբաղի հակամարտության լուծման փոխզիջումային տարբերակների որոնման գործընթացի արդյունավետության ուղղությամբ եւ հույս է հայտնում, որ շահագրգիռ կողմերը կառուցողական վերաբերմունք կցուցաբերեն հակամարտության կարգավորման հարցում»:
