Կին-տղամարդ փոխհարաբերությունների մեջ բազմաթիվ անգամներ կարող են դրական եւ բացասական երեւույթներ տեղի ունենալ, որոնք որոշիչ դեր կարող են խաղալ հետագա հարաբերությունների ընթացքի վրա: Նման անկանոն հարաբերությունները, ըստ մասնագետների, հատկապես բնորոշ են, երբ այն կառուցվում է հեռավորության վրա, որտեղ կենդանի շփմանը փոխարինում են նոր տեխնոլոգիաները, որը չնայած ունի բազմաթիվ դրական կողմեր, բայց, այնուամենայնիվ, հարաբերություններում առաջացած խնդիրը դրա միջոցով դժվար է կարգավորել: Ըստ հոգեբան Աննա Բադալյանի, այսպիսի շփման ժամանակ ուղղակի անհրաժեշտ է առանց ավելորդ լարվածության, առանց ավելորդ ձեւականության իր տեսակը, ինչպես որ կա` չփոխել, եւ թեպետ շփումը վիրտուալ է` անհրաժեշտ է կյանքի, առօրյայի մեջ ներգրավել նրան` մինչեւ որ հարաբերությունները տեղափոխվեն իրական շփման դաշտ:
«Պետք է հաշվի առնել, որ զգացմունքները վայրէջքներ եւ վերելքներ են ունենում եւ կարեւոր է դառնում բոլոր իրավիճակներում հետաքրքրությունը սեփական անձիդ հանդեպ չկորցնել, քանի որ երբ ինքդ քեզ չես սիրում, ուրիշը քո ջերմության կարիքը չի ունենա»,- նշեց հոգեբանը:
Նա խոսելով նաեւ այդ հարաբերության ժամանակ միմյանց նեցուկ լինելու մասին՝ ասաց, որ կին-տղամարդ փոխհարաբերությունները բավականին հզոր ու անբեկանելի են լինում, երբ զույգերը զգում են միմյանց ապավինելու կարիքը: Խոսքը, ըստ հոգեբանի, բարոյական եւ հուզական նեցուկի մասին է: Այսպիսի հոգեվիճակները, ըստ մասնագետի, առաջանում են հատկապես այն ժամանակ, երբ մարդ ունենում է հուզական անկման պահ, երբ ամենից շատ զգում է սիրելիի կարիքը, որը ինչ-որ պատճառով կողքը չէ: «Ներքուստ ցանկանում ես, որ բազմաթիվ մարդկանց փոխարեն նա լինի քո կողքին: Ցավոք, երբեմն մեր ցանկությունները չեն համապատասխանում իրական ընթացքին եւ առաջ են գալիս հարցեր` ի՞նչ անել, ինչպե՞ս ապրել, որ հուզական ֆոնը շատ չխարխլվի, որը ինչքան էլ դժվար է, բայց, այնուամենայնիվ, ինչպես եւ ցանկացած խնդրի դեպքում` ելք կա»,- նշեց հոգեբանը:
«Առաջին հերթին պետք է շնորհակալ լինել այն մարդկանց, ովքեր քեզ մենակ չթողեցին, նրանք քեզ գնահատեցին: Հետո գնահատել պահի, իրավիճակի լրջության մեջ ձեր զգոն պահվածքը: Այս դեպքում դուք կլինեք ավելի ուժեղ եւ կկարողանաք պահպանել ձեր ինքնագնահատականը: Այդ ընթացքում, ում ցանկանում էիք, որ ձեր կողքին լինի` ժամանակ կտաք, որ վերաիմաստավորի իր եւ ձեր հարաբերությունները, իր քայլը»,- ասաց Աննա Բադալյանը:
Նա նշեց, որ այդպիսի իրավիճակներում եթե «նեղացնողը» ընդունեց իր սխալը, ապա ամեն ինչ կընթանա իր հունով, իսկ եթե ոչ, ապա ամենեւին չարժե հուզական խոր ապրումներ ունենալ մի անձի հանդեպ, ով չգնահատեց քո տեսակը:
Պատրաստեց
ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
02.04.2016