«Համեստ, աշխատող, չարքաշ ապրուստով ապրող մարդիկ էին»,-նկարագրելով զոհված համագյուղացուն ու նրա ընտանիքին՝ ասաց Գուգարքի գյուղապետ Աշոտ Աշուղյանը:
Այսօր երեկոյան Լոռու մարզի Գուգարք գյուղում, որը հայտնի է նաեւ Մեղրուտ անունով, տեղի կունենա Լեռնային Ղարաբաղում հակառակորդի գործողություններից զոհված Նոդարիկ Մարգարյանի հոգեհանգստի արարողությունը:
Այս պահին էլ համագյուղացիները` մեծից փոքր, այցելում են զոհված զինվորի ընտանիքին ցավակցելու, մխիթարելու: Այս մասին Aravot.am-ի հետ զրույցում ասաց Գուգարքի գյուղապետ Աշոտ Աշուղյանը: Նա նույնպես մեծ վշտով է ընդունել Նոդարիկ Մարգարյանի մահվան մասին լուրը:
Գյուղապետը նաեւ ասաց, որ այն պահից, երբ լուրը լսել են, համագյուղացիները մենակ չեն թողնում Նոդարիկի մորը, որը մեծահասակ կին է: Զոհված զինվորը հայր չունի:
Կարդացեք նաև
Աշոտ Աշուղյանի խոսքերով՝ Նոդարը կնոջ մահից հետո տեղափոխվել է Լեռնային Ղարաբաղ եւ աշխատում էր որպես պայմանագրային զինծառայող, 52 տարեկան էր:
Գյուղապետն ասաց, որ զոհված Մարգարյանն ունի երկու որդի, մեկ դուստր: Ըստ պաշտպանության նախարարության՝ նա ծառայում էր Մատաղիսի ԶԿ-ում:
Լուսինե ԲՈՒԴԱՂՅԱՆ