Քիչ առաջ Գյումրու «Սուրբ Նշան» եկեղեցում տեղի ունեցավ Թալիշում մղված մարտերի ժամանակ հերոսաբար զոհված 23-ամյա ավագ-լեյտենանտ Մերուժան Ստեփանյանի հոգեհանգստի կարգը: Գյումրեցիների հոսքը դեպի եկեղեցի չէր դադարում. գալիս էին հրաժեշտ տալու իրենց հերոսին, որը իր կյանքի գնով փրկեց եկեղեցում կանգնածների կյանքը:
Հոգեհանգստի կարգը կատարեց Շիրակի թեմի առաջնորդ Միքայել եպիսկոպոս Աջապահյանն ու թեմի քահանաները: Առ Աստված աղոթք բարձրացնելուց բացի, Սրբազանը խրոխտ ելույթ ունեցավ՝ հորդորելով չլացել, չսգալ, քանի որ Մերուժանն անմահ է, քանի որ նա գիտեր ինչու համար է մահանում, գիտակցաբար գնաց իր կյանքը տալու ու այժմ պարտավոր ենք փառավորելու նրա հիշատակը: Մերուժանը, Սրբազանի բնութագրմամբ, իր սերը հայրենիքի, ծնողների, սիրած մարդկանց հանդեպ ապացուցեց ոչ թե խոսքերով, այլ գործով. իր կյանքը տվեց, որպեսզի հայրենիքը հարատեւի, սիրելիները ապրեն:
Կարդացեք նաև
«Մերուժանը կոնկրետ ինձ է փրկել այն փամփուշտից, որն ինձ էր կպնելու»,- ասաց Սրբազանը:
Դրսում կանգնածները ցուցապաստառներ էին բռնել՝ «Փառք մեր հերոսներին» գրառմամբ:
Վաղը մեր հերոսին կհուղարկավորեն եկեղեցուց:
Նունե ԱՐԵՎՇԱՏՅԱՆ
