Իրավիճակը Լեռնային Ղարաբաղում պահանջում է շուտափույթ քաղաքական լուծում գտնել ճգնաժամի կարգավորման համար՝ այսօր Բաքվում հայտարարել է ՌԴ արտգործնախարար Սերգեյ Լավրովը Իրանի եւ Ադրբեջանի արտգործնախարարների հետ եռակողմ հանդիպման արդյունքներով` նշելով. «Մենք գոհունակությամբ փաստել ենք հրադադարի ձեռքբերումը… Մենք հույս ունենք, որ պայմանավորվածությունը կպահպանվի եւ կիրագործվի, այդ թվում, հաշվի առնելով այն, որ գոյություն ունեն հայտնի համաձայնագրեր, որոնք ընդունվել են դեռեւս 90-ականներին։ Ներկայիս իրավիճակը մեզնից բոլորիցս պահանջում է նախկինում ունեցած պայմանավորվածությունների ավելի ակտիվ դիտարկում, վստահության միջոցառումներ մշակում շփման գծում։ Դրանք քննարկվել են ԵԱՀԿ Մինսկի խմբի համանախագահների կողմից»։
Այնուհետեւ Լավրովը հավելել է, թե Ռուսաստանն ու Ադրբեջանը անվտանգության հարցերով երկխոսության համար լավ հեռանկարներ ունեն. «Բանակցությունները համագործակցության լավ հեռանկարներ ցույց տվեցին տարբեր ոլորտներում, ներառյալ՝ անվտանգության հարցերը»:
ՌԴ նախագահի մամլո քարտուղար Դմիտրի Պեսկովն իր հերթին` նշել է, թե Լեռնային Ղարաբաղում իրավիճակը հեռու է կայուն լինելուց, Մոսկվան չի ծրագրում դադարեցնել աշխատանքը՝ ուղղված հակամարտության կարգավորմանը։ «Անշուշտ, իրավիճակը դեռեւս հեռու է կայուն լինելուց, այդ իսկ պատճառով պարզապես անհնար է ձեռք բերվածի վրա կանգ առնելը, եւ ոչ ոք չի պատրաստվում դա անել»: Նրա խոսքով՝ Մոսկվան հակամարտության սրման ամենասկզբից գործադրել եւ գործադրում է զգալի ջանքեր՝ դրա կարգավորման համար պայմանների ստեղծման նպատակով։ «Ռուսաստանը, պահպանելով բարի գործընկերային հարաբերություններ եւ՛ Երեւանի, եւ՛ Բաքվի հետ, կիրառում է այդ բարի հարաբերությունները պայմանների ստեղծման համար՝ աշխատելով ինչպես երկկողմ հիմքով, այնպես էլ միջազգային մեխանիզմների շրջանակում»։
Կարդացեք նաև
Առավել ուշագրավ է Ադրբեջանի ԱԳ նախարար Էլմար Մամեդյարովի հայտարարությունը: Նա նախ նշել է, թե անհրաժեշտ է կարճ ժամանակում հասնել ղարաբաղյան հակամարտության կարգավորման, ապա հավելել է, թե` «աշխատում են անցյալ տարվա կեսերից Լավրովի կողմից ներկայացրած առաջարկների վրա»:
Ի՞նչ առաջարկներ է ներկայացրել Մոսկվան: Պաշտոնական Երեւանին ու Ստեփանակերտին այդ առաջարկները ներկայացվե՞լ են: Եթե այո, ապա դրանք համահո՞ւնչ են պաշտոնական Երեւանի` այս օրերին առաջ քաշած սկզբունքներին:
Այս եւ այլ հարցերի մասին կարդացեք ապրիլի 8-ի տպագիր «Առավոտ»-ում` առավել մանրամասն:
ԷՄՄԱ ԳԱԲՐԻԵԼՅԱՆ
Լավրովը և Մենդեդևը հարավային տարածաշրջան եկել են զուտ մեկ պատճառով- Նազարբաևը դեպքերի զարգացման ամենաթեժ պահին` ապրիլի 4-ից հետո մեկնել է Բաքու , որտեղից էլ հրահանգել է Պուտինին ամեն կերպ կանգնեցնել Հայ տղերքի առաջխաղացումը: Սա ի քծնվություն փոքրիկ ալիևին – իսկ Ադրբեջանին ՀԱՊԿ-ում տեսնելը նաև ՌԴ-ի երազանքն է, չնայած ազերները ավելի շուտ կվերացնեին ՌԴ-ն, որ միանան Թուրքիային: Բոլոր դեպքերում բոլորին ձեռնտու էր պատերազմի ծավալման կանգնեցումը, բացի Հայերից – ազերները օգտվեցին իրավիճակից ու այս անգամ ազերների համար որպես աստված հանդիսացավ ոչ ավել, ոչ պակաս Նազարբաևը: