«Դա, հավանաբար, այն էր, որ Տեր-Պետրոսյանը շարունակում է լինել փոխզիջումային բանակցային գործընթացի կողմնակից եւ պատրաստ է աջակցել
Սերժ Սարգսյանին, եթե նա համաձայնվի Մադրիդյան սկզբունքների հիման վրա բանակցություններ վերսկսել»,- «Առավոտի» հետ զրույցում ասաց ՀՀ նախկին արտգործնախարար Ալեքսանդր Արզումանյանը` անդրադառնալով Լեւոն Տեր-Պետրոսյանի երեկվա հարցազրույցի` արտաքին աշխարհին ուղղված ուղերձներին:
Մեր զրուցակիցը նաեւ նկատեց. «Երբ այլ քաղաքական գործիչները հանդիպում էին Սերժ Սարգսյանի հետ, ընդ որում, մեր պետության համար շատ կարեւոր` Սահմանադրության, գլխավոր օրենքի քննարկման համատեքստում, դա համարվում էր հաճախորդություն: Սոցիալական ցանցերը եւ առաջին նախագահին սատարող լրատվամիջոցները հեղեղված էին այդ մարդկանց վարկաբեկող նյութերով: Բայց այս օրերին խոսվում է, թե ի՜նչ մեծ քաղաքական գործչի քայլ էր եւ այլն: Սա նշանակում է, որ մեր քաղաքական դաշտն առաջնորդվում է երկակի ստանդարտներով»: Հիշեցնենք, ՀՀՇ-ն եւս սահմանադրական բարեփոխումների քննարկումների շրջանակում հանդիպում ունեցավ նախագահ Սարգսյանի հետ: Այդ կազմում նաեւ Ալեքսանդր Արզումանյանն էր: Արդյոք Ձեր մեջ նեղացածությո՞ւնն է խոսում` հարցին մեր զրուցակիցն արձագանքեց. «Ես որեւէ մեկից ու որեւէ բանից նեղացած չեմ:
Ես տասը հարցազրույց եմ տվել եւ բացատրել եմ, որ սա «Յոմ-Կիպուրի» պատերազմն է հիշեցնում: Ուրախ եմ, որ ինքն ուշադիր նայում է եւ, փաստորեն, կիսում է իմ արտաքին քաղաքական գնահատականները»:
Կարդացեք
Կարդացեք նաև
«Առավոտ» օրաթերթ
12.04.2016
