«Կարող ենք հույսեր փայփայել, որ մի գեղեցիկ օր կունենանք հայազգի Նոբելյան մրցանակակիր: Բայց հիմա դեռ վաղ է այդ մասին խոսելը»,- այսօր՝ «Նոբելյան օրեր Երևանում» միջոցառման մեկնարկից առաջ, լրագրողների հետ ճեպազրույցում այսպիսի տեսակետ հայտնեց Երևանի Մխիթար Հերացու անվան պետական բժշկական համալսարանի հոգաբարձուների խորհրդի նախագահ Արմեն Աշոտյանը:
Նրա համոզմամբ, անկախ նրանից, թե ինչ ոլորտի գիտնականներ են համախմբվում այս կամ այն առիթով, անհրաժեշտ է հիշել, որ գիտությունը պետք է ծառայի խաղաղությանը. «Մարդկության գիտական առաջընթացը չպետք է մահաբեր լինի, ինչպես լինում է ժամանակակից զենքի օգտագործման դեպքում: Կարծում եմ, որ հատկապես այս օրերին կարևոր է խոսել նաև այդ մասին»,- ասաց Արմեն Աշոտյանը:
ՀՀ կրթության և գիտության նախկին նախարարը հիշեց, որ մի քանի տարի առաջ ինքը՝ որպես պաշտոնավարող նախարար, առիթ ունեցել է հանդիպելու այժմ Երևանում գտնվող Նոբելյան մրցանակակիրներից մեկի՝ Ահարոն Չեխանովերի հետ. «Շատ հետաքրքրիր էր նրա հետ առանձնազրույցում լսել, թե ինչպես է զարգանում գիտությունն Իսրայելում: Ամենահետաքրքիրն այն էր, որ նա բողոքում էր գիտնականների արտագաղթից դեպի ԱՄՆ:
Մենք սովոր ենք խոսել, որ հայ ժողովուրդն իր պատմությամբ շատ զուգահեռներ ունի հրեա ժողովրդի հետ, բայց այդ զուգահեռները կյանքի կոչելու համար պետք է գտնել ազգի իրական ներուժի համախմբման մեխանիզմները: Այսօր մենք այդ ճանապարհը չենք հաղթահարել: Մենք դեռ մեր ազգային, մարդկային կապիտալը լավագույնս չենք կարողացել օգտագործել»,- ասաց Արմեն Աշոտյանը:
Կարդացեք նաև
Նշենք, որ ապրիլի 12-15-ն անցկացվող «Նոբելյան օրեր Երևանում» միջոցառման նախաձեռնողը Երևանի Մխիթար Հերացու անվան պետական բժշկական համալսարանն է: Միջոցառմանը, Ահարոն Չիխանովերից (Իսրայել) բացի, մասնակցում են նաև Էյ-Իշի Նեգիշին (Ճապոնիա), Դեն Շեխտմանը (Իսրայել), Ադա Յոնաթը (Իսրայել) և Ջոն Ուորենը (Ավստրալիա), որոնք հինգ օրվա ընթացքում դասախոսություններ կկարդան հայ գիտնականների և ուսանողների համար:
«Մենք մեծ սպասելիքներ ունենք նրանց դասախոսություններից,- լրագրողների հետ զրույցում ասաց Բժշկական համալսարանի ռեկտոր Միքայել Նարիմանյանը,- նրանք կներկայացնեն գիտության այն ճյուղերը, որոնցում չափազանց բարձր արդյունքների են հասել: Այդ արդյունքներն այս կամ այն կերպ կապված են բժշկության հետ և նպաստում են բժշկագիտության զարգացմանը:
Բացի դրանից, նաև ակնկալում ենք մեր հյուրերի ղեկավարությամբ մշակել գիտական նոր ծրագրեր, որոնք հետագայում հնարավորություն կտան շարունակաբար ընդգրկվելու նրանց ղեկավարած գիտական հետազոտությունների մեջ»:
Սիրանուշ ՀԱՅՐԱՊԵՏՅԱՆ
