Հայաստանի նկարիչների միությունը կազմակերպել է իր պահոցներում գտնվող 1960-80-ականների նկարիչների ու քանդակագործների 80 լավագույն աշխատանքների ցուցահանդես-վաճառք, որպեսզի ողջ հասույթը տրամադրի Արցախին:
Միության նախագահ Կարեն Աղամյանն այսօր լրագրողների հետ ճեպազրույցում ասաց, որ դեռ չեն որոշել՝ հավաքված գումարը բանակի կարիքները հոգալուն է ուղղվելու, թե տրամադրվելու է քառօրյա պատերազմի հետևանքով զոհված զինծառայողների ընտանիքներին: Այդ հարցով կխորհրդակցեն Պաշտպանության նախարարության հետ և ըստ այդմ էլ կորոշեն:
«Հատկապես այս օրերին ամեն մի հայ իրեն պարտավորված է զգում ինչ-որ բանով աջակցելու մեր բանակին: Հայաստանի նկարիչների միությունը չէր կարող անմասն լինել այդ համընդհանուր շարժումից»,- ասաց Կարեն Աղամյանը:
Ցուցահանդեսը բացվել է այսօր և կգործի մինչև ապրիլի 23-ը:
Կարդացեք նաև
Ցուցահանդես-վաճառքում ներկայացված ստեղծագործությունները, որոնք ժամանակին գնել է Նկարիչների միությունը, վաճառվում են իրենց իրական արժեքից անհամեմատ ավելի ցածր գնով. «Եռակի, քառակի ցածր գներ ենք որոշել, որպեսզի շատերը կարողանան գնել դրանք և այդպիսով իրենց լուման ներդնել այս ազգանվեր գործում: Սա այն հարցն է, որ մենք ափսոսալու տեղ չունենք»,- ընդգծեց նա:
Հայաստանի նկարիչների միության նախագահի փոխանցմամբ՝ այսօր արդեն եղել են գնորդներ. «Հուսով ենք, որ մինչև ապրիլի 23-ը շատերը կարձագանքեն: Նաև Սփյուռքի նախարարության հետ կհամագործակցենք, որպեսզի արտասահմանում բնակվող մեր հայրենակիցներն էլ տեղեկանան ցուցահանդեսի մասին և ցանկության դեպքում կարողանան ձեռք բերել ներկայացված գործերից»,- նշեց Կարեն Աղամյանը:
Հավելենք, որ ցուցահանդես-վաճառքում ընդգրկված են Գետիկ Բաղդասարյանի, Գարեգին Դավթյանի, Ֆելիքս Եղիազարյանի, Ռոբերտ Խաչատրյանի, Արամ Նազարյանի, Արմեն Աթայանի, Փարավոն Միրզոյանի, Ռաֆիկ Խաչատրյանի, Ալեքսանդր Գևորգյանի և այլոց ստեղծագործություններ:
Սիրանուշ ՀԱՅՐԱՊԵՏՅԱՆ
