«Աջակցենք սահմանամերձ բնակավայրերին» քաղաքացիական նախաձեռնությունն, ամենայն հավանականությամբ, առաջին անհրաժեշտության պարագաների երրորդ խմբաքանակն այս շաբաթ կտանի Արցախ:
«Աջակցենք սահմանամերձ բնակավայրերին» քաղաքացիական նախաձեռնության անդամ Սոֆյա Հովսեփյանն ու իր ընկերներն այսօր ամփոփեցին իրենց նախաձեռնության աշխատանքները:
Սոֆյա Հովսեփյանի խոսքով, նախատեսված անհրաժեշտ ապրանքների առաջին խմբաքանակը ապրիլի հինգին են ուղարկել Արցախ, երկրորդ խմբաքանակը՝ ապրիլի իննին, իսկ երրորդ խմբաքանակը, ամենայն հավանականությամբ, այս շաբաթ կտանեն:
Իսկ այս անգամ սնունդ չեն տանելու, որովհետեւ դրա կարիքը այժմ չեն տեսնում, կտանեն ներքնաշորեր, ծխախոտ ու առաջնային անհրաժեշտություն ունեցող այլ պարագաներ:
Կարդացեք նաև
Նրա պատմելով, իրենց օգնությունն անմիջապես զինվորներին է հասել, ու իրենց բոլոր մտահոգությունները, թե Երեւանից Արցախի համար նախատեսված օգնությունը զինվորներին չի հասնում, վերացան. «Գնացինք ու ցրեցինք այդ կարծիքը, որ զինվորին չի հասնում սնունդ»:
Նախաձեռնության անդամ Մաքսիմ Սարգսյանն էլ ասաց, որ իրենք պատասխանատու են այն ապրանքի համար, որոնք իրենք են հավաքագրում ու տանում Արցախ: Ըստ նրա՝ եթե բոլոր այն ապրանքները, որոնց լուսանկարները պտտվում են համացանցում, հասած լիներ զինվորներին, շատ բաների կարիք չպետք է որ լիներ:
Արտուշ Չիբուխչյանն էլ կոչ արեց, որ աջակցություն հայտնողներն անձամբ հասցնեն զինվորին իրենց օգնությունը:
Անդրադառնալով Արտակարգ իրավիճակների նախարարության կողմից իրականացվող համակարգման աշխատանքներին՝ Մաքսիմ Սարգսյանն ասաց, որ իրենք երկրորդ անգամ հենց ԱԻՆ-ի հետ տարան օգնությունը. «Երբ հասանք Ստեփանակերտ, պարզվեց, որ այդ ամենը դեռ պետք է պահեստավորվի, տեսակավորվի, հետո նոր բաժանվի, ինչը կարող է տևել մի քանի օր, և դա դժգոհություններ առաջացրեց»:
Այս անգամ նախաձեռնության անդամներն առանց ԱԻՆ-ի կտանեն օգնությունը, իսկ այս շաբաթ՝ չորեքշաբթի եւ հինգշաբթի օրերին Արցախ տանելու համար նախատեսված իրերի հավաքագրում են հայտարարել Մաշտոցի պուրակում:
Արփինե ՍԻՄՈՆՅԱՆ
