Վերջին օրերին համացանցում լայն տարածում էր գտել մի տեսանյութ, որում ՀՀ երկրորդ նախագահ Ռոբերտ Քոչարյանը նախագահական նստավայրում հրավիրված մի ասուլիսից առաջ «Kinder Surprise» ձվիկ էր ուտում և փորձում լուծել ձվիկի մեջ եղած խաղալիք-գլուխկոտրուկը:
Տեսանյութում ներկա էր նաև «Առավոտ» օրաթերթի գլխավոր խմբագիր Արամ Աբրահամյանը, ով մեզ հետ զրույցում հուշեց, որ Ռ. Քոչարյանին նմանօրինակ նվերի հեղինակը հայտնի գրող, կինոսցենարիստ և լրագրող Վահրամ Մարտիրոսյանն էր: Այն ժամանակ վերջինս «ԱՐ» հեռուստաընկերության փոխնախագահն էր:
168.am-ի հետ զրույցում պարզվեց, որ սա Վահրամ Մարտիրոսյանի կողմից ՀՀ երկրորդ նախագահ Ռ. Քոչարյանին արված առաջին ու վերջին նվերը չէր: Ամեն անգամ, երբ լրագրողները հրավիրվում էին նախագահական նստավայր՝ մամուլի ասուլիսի կամ զրույց ունենալու նախագահի հետ՝ Վահրամ Մարտիրոսյանը երբեք ձեռնունայն չէր գնում այնտեղ: Վ. Մարտիրոսյանը մեզ հետ զրույցում՝ լույս սփռելով իր այդ սովորության վրա, մանրամասնեց.
– Դրանք ուղղակի նվերներ չէին, այլ ակնարկող իմաստ ունեին: Ռոբերտ Քոչարյանը շատ էր սիրում կարմիր ժապավեններ կտրել, որ՝ հես ա՝ արդյունաբերությունը Հայաստանում չգիտեմ ինչ թափ է հավաքելու: Էդպես ես մի անգամ հետս մկրատ տարա: Հիշում եմ, որ շատ մեծ դժվարությամբ այդ մկրատը ներս՝ նախագահի նստավայր անցկացրեցի: Ինքը բավականին հաճախ էր դաշտում հայտնի մի քանի լրագրողների հետ ասուլիս կազմակերպում՝ Արամ Աբրահամյանի, Ռոբերտ Մավիսակալյանի, իմ և Արմեն Արզումանյանի հետ, ով, որքան հիշում եմ, այն ժամանակների Պետական հեռուստատեսության լրատվության բաժնի նորանշանակ ղեկավարն էր: Ամեն անգամ, երբ ես իմ հարցն էի հնչեցնում, այդ հարցի ենթատեքստի հետ կապված՝ հանձնում էի իմ պատրաստած նվերը: Այդ մկրատի դեպքն էլ հարցի հետ էր կապված. Ասացի՝ ես նկատել եմ, որ Դուք շատ եք սիրում նորակառույցներ բացել, այս մկրատն էլ տալիս եմ, որ ավելի շատ թվով կարմիր ժապավեններ կտրեք: Հիշում եմ, որ Ռոբերտ Քոչարյանը շատ էր շփոթվում, չէր կարողանում ռեակցիա տար:
Կարդացեք նաև
Վահրամ Մարտիրոսյանը հիշում է, որ մի անգամ էլ՝ հերթական հանդիպման ժամանակ, որոշել է նախագահին «Արշակավան» գինի նվիրել.
– Չգիտեմ՝ ո՞ւմ մտքով էր անցել «Արշակավան» գինի թողարկել, մեզ մի արկղ նվիրել էին, ես էլ դրանցից մեկը տարա ու նվիրելուց ասացի՝ գիտե՞ք, այն, ինչ կատարվում է այս օրերին մեր երկրում, ինձ հիշեցնում է Արշակավանը, որտեղ գող ու ավազակներ էին հավաքվում, ու գինին նվիրեցի իրեն: Դե, քանի որ ինքը շատ վատ գիտի հայոց պատմությունը, չհասկացավ, թե ինչի՞ մասին է խոսքը, որպեսզի մեծ հաշվով համապատասխան ռեակցիա տար, պարզապես վերցրեց գինին ու դրեց սեղանին: Հիշում եմ, որ այդ առիթով մի ջանադիր լրագրող, որի անունը չեմ ուզում բարձրաձայնել, զանգել էր նախագահական ու «խելքի» էր գցել, որ Վահրամն այդ գինու փոխարեն՝ կարող էր «Մոլոտովի կոկտեյլ» անցկացնել, ու որքանով իմացա՝ նախագահի աշխատակազմի պահակախմբից մի քանի աշխատողներ հեռացվեցին, նրանք, ովքեր այդ ժամանակ հերթափոխի էին եղել: Անկախ ինձանից՝ այդ մարդկանց գործազրկության պատճառը ես դարձա:
ՀՀ երկրորդ նախագահ Ռոբերտ Քոչարյանի համար Վահրամ Մարտիրոսյանը մի առիթով նույնիսկ «շուշա» կոնֆետների մի փաթեթ է տարել.
– Ամենաառաջին անգամ, երբ մեզ զանգահարեցին նախագահականից, ասացին, որ նախագահը մեզ հրավիրում է թեյ խմելու: Դե, ես էլ մտածեցի, որ թեյի են հրավիրում, մի բան պետք է վերցնեմ հետս, բայց «բոմբոներկա» չէի վերցնի, այդպիսի տափակություն չէի անի, «շուշա» կոնֆետ գնեցի, տարա: Մոտավորապես մեկ, մեկուկես ժամ այդ զրույցը ձայնագրվեց, ավարտվեցին, եկան նախագահին ասացին, որ ինքն արդեն հանդիպում ունի, ինքն ասաց՝ լավ, ավարտենք, ես էլ ասացի՝ բա թե՞յը, մեզ զանգեցին ասացին, որ թեյի են հրավիրել, ես էլ պատրաստված եկել եմ՝ «շուշա» կոնֆետով, Քոչարյանն ասաց՝ լավ, թեյ բերեք… Էդպես էլ դա անցավ:
Իսկ օրերս համացանցում տարածված հայտնի տեսանյութի պատմությունը, որտեղ Ռոբերտ Քոչարյանը «Kinder» ձվիկ է ուտում, այսպես է եղել.
– Այդ անգամ հետս մի քանի «Kinder Surprise» էի վերցրել: Երբ հերթական հարցազրույցից հետո սուրճ հյուրասիրեցին, ասացի, որ ես էլ հետս «Kinder Surprise» եմ բերել: Քոչարյանը դրան ծանոթ չէր, երևի դա դեռ Ղարաբաղ չէր հասել, իսկ ինքը բոլորովին վերջերս էր տեղափոխվել Ղարաբաղից Հայաստան: Քոչարյանը վերցրել էր էդ «Kinder Surprise»-ը ու չգիտեր՝ ինչ աներ: Իր խորհրդական Ալիկ Հարությունյանը մոտեցավ, ականջին խորհուրդ տվեց, որ վրայի փաթեթավորումը հանի:
Հանեց, բացեց, խաղալիքներն ընկան միջից: Երկու կես արեց, կերավ շոկոլադը, հետո Ալիկը նորից մոտեցավ, ականջին հուշեց, որ խաղալիքը պետք է հավաքել, Քոչարյանը հավաքեց՝ հրթիռ դուրս եկավ, ես էլ ասացի՝ ա՜յ տեսնո՞ւմ եք, հետո էլ ասում եք, որ մենք պատերազմի կուսակցություն չենք, տեսա՞ք՝ ի՞նչ դուրս եկավ միջից: Ինքը շատ ջանասիրաբար հավաքեց հրթիռը, դե պարզ է, որ հեշտ կոնստրուկցիա էր, իրենից բարդ բան չէր ներկայացնում: «Kinder Surprise»-ի տեսագրությունը կա համացանցում, դրա համար եմ ես ողջ մանրամասներով պատմում այդ դեպքը:
Մանրամասներին կարող եք ծանոթանալ` «168.am»-ի կայքում
Փաստորեն Վահրամ Մարտիրոսյանը հա՛մ ընտրյալների մեջ է եղել, հա՛մ մեծ ռիսկերի է գնացել,հա՛մ էլ Պողոս Պողոսյանի բախտին չի արժանացել: