ՀՀԿ խմբակցության պատգամավոր Մանվել Բադեյանը ողջունում է Լևոն Տեր-Պետրոսյանի հայտարարությունը, թե «Ղարաբաղի և Հայաստանի իշխանությունները հանգիստ ու զուսպ անում են այն, ինչ պահանջում է այսօրվա իրավիճակը»: ՀՀ առաջին նախագահը նման հայտարարությամբ հանդես եկավ ԼՂՀ նախագահ Բակո Սահակյանի հետ հանդիպումից հետո: Այդ հայտարարությունից հետո հանրության շրջանում հարց առաջացավ` արդյոք ու՞մ է հայտնի, թե ինչ են անում ԼՂՀ և ՀՀ իշխանությունները:
Պարոն Բադեյանը բնական է համարում, որ լայն հասարակությանը չպետք է հայտնի լինեին իշխանությունների կատարած քայլերն այս իրավիճակում: Aravot.am-ի հետ զրույցում պարոն Բադեյանը փոխանցեց. «Ուզում եք պատերազմի ժամանակ թափանցիկությո՞ւն ունենանք, նման բան որտե՞ղ եք տեսել»:
Մանվել Բադեյանը երկու նախագահների հանդիպումը անհրաժեշտ է համարում և հստակ ուղերձ տեսնում Լևոն Տեր-Պետրոսյանի հայտարարության մեջ. «Ըստ էության, դա զսպվածության կոչ էր»:
Հարցին` արդյոք այս հանդիպումից հետո իրավիճակ կփոխվի՞, պարոն Բադեյանն այսպես արձագանքեց. «Արդեն փոխված իրավիճակն է փաստում. Լևոն Տեր-Պետրոսյանն ասում է այն մասին, որ ղարաբաղյան հարցում չկա ընդդիմություն և իշխանություն և ոչ մի սեպ չի կարելի խրել մեր մեջ: Դա ակնհայտ է, թափանցիկ և նույնիսկ բառացիորեն է ասվել»:
Կարդացեք նաև
Լևոն Տեր-Պետրոսյանի հայտարարության առիթով հնչած քննադատություններին ի պատասխան՝ Մանվել Բադեյանը հակիրճ ասաց. «Ով որ լավ բան չի տեսնում այդ ամենում, ուրեմն չի ուզում տեսնել միասնական ժողովուրդ Ղարաբաղի հարցում»:
Հիշեցնենք, որ «Ժառանգություն» կուսակցության փոխնախագահ Արմեն Մարտիրոսյանը քննադատել էր Լևոն Տեր-Պետրոսյանի հայտարարությունը` հիշեցնելով այն, որ նա անշրջելի էր համարել ԵՏՄ մտնելու գործընթացը և եզրափակել.«Եթե այս ամենը զուսպ է համարվում, Լեւոն Տեր-Պետրոսյանը եւ Սերժ Սարգսյանը կարող են այդ զսպությունն իրար հետ շարունակել»:
Տաթև ՀԱՐՈՒԹՅՈՒՆՅԱՆ
