Պեպենները մաշկի վրա բաց եւ մուգ, դեղին, ոչ մեծ պիգմենտային հետքեր են, որոնք հիմնականում հայտնվում են դեմքի եւ դաստակների, երբեմն նաեւ իրանի վրա: Պեպեններն առաջանում են մաշկում հատուկ գունանյութի՝ մելանինի կուտակումով, որոնք, ի տարբերություն խալերի, չեն պարունակում մեծ քանակությամբ մելանին արտադրող բջիջներ:
Կախված արեւի ներգործության աստիճանից եւ ազդման ժամանակից, պեպենների գույնը կարող է փոխվել բաց-դեղինից մինչեւ մուգ-շագանակագույն: Արեւի լույսը ոչ միայն պեպենները դարձնում է ավելի մուգ, այլեւ առաջացնում է նոր մելանինի սինթեզ, ինչի պատճառով էլ առաջանում են նոր բծեր, նույնիսկ այն դեպքում, երբ դրանք անհետացել էին տարբեր քսուքներից կամ լազերի կիրառումից:
Այդ է պատճառը, որ պեպեններ ունեցող մարդկանց մոտ գարնանը դրանք էլ ավելի են արտահայտվում: Հայտնի է նաեւ, որ պեպենների դեմ լավ միջոց է մաղադանոսը: Անհրաժեշտ է այն մանր կտրատել, վերցնել 1 ճաշի գդալ եւ խառնել նույնքան մեղրի հետ։ Դիմակը քսել դեմքին եւ պահել 45 րոպե։ Այս խառնուրդը կարելի է նաեւ պատրաստել կիտրոնի հյութով, այդ դեպքում անհրաժեշտ է վերցնել 2 ճաշի գդալ մաղադանոս, մեղր եւ կիտրոնի հյութ, զանգվածը խառնել եւ քսել դեմքին, պահել 15 րոպե եւ լվանալ։
Եթե ձեր մաշկը պատկանում է չոր եւ նորմալ տիպին եւ ունեք բծեր, պեպեններ, ապա առաջարկվում է հետեւյալ սպիտակեցնող դիմակը.
Կարդացեք նաև
1 կիտրոնի հյութը խառնել 50 գրամ հեղուկ մեղրի հետ։ Թանզիֆե կամ թղթե անձեռոցիկները թաթախել այդ խառնուրդով եւ դնել դեմքին։ 15-20 րոպե հետո դրանք փոխել ուրիշներով, այդպես 2-3 անգամ։ Դեմքը լվանալ գոլ ջրով։ Ընդամենն օգտագործվում է 15-20 դիմակ մի քանի օր ընդմիջումներով՝ կախված մաշկից։ Չոր մաշկի դեպքում նախապես քսել յուղոտ սնուցիչ քսուք:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
04.05.2016
