Մայիսի 7-ին Հ. Շարամբեանի անվան ժողովրդական ստեղծագործության կենտրոնում կբացվի ժողովրդական վարպետ Արփի Ավդալյանի ցուցահանդեսը: Ինչպես «Առավոտի» հետ զրույցում նշեց վարպետը. կցուցադրվեն ոչ միայն նկարները, այլեւ ասեղնագործ զարդերը՝ արծաթե շրջանակներով, ասեղնագործ ստեղծագործությունները:
Արփի Ավդալյանի առաջին ցուցահանդեսը նույն թանգարանում կայացել է 4 տարի առաջ, բացի այդ, մի քանի ցուցադրություն է ունեցել, երեք անգամ էլ արտասահմանում է ցուցադրվել: Այս անգամ նա շուրջ 35 ստեղծագործություն կներկայացնի: Ցուցահանդեսի խորագիրն է՝ «Հոգին իբրեւ զարդանախշ», որը հոր՝ ճանաչված բանաստեղծ Աշոտ Ավդալյանի ստեղծագործության տողն է:
Արփին ասում է, որ ժամանակը հասունացել էր նոր ցուցահանդես կազմակերպելու համար, ու դեռեւս անցյալ տարի էր ծրագրել:
«Իմ գործերն արվում են առանց էսքիզի ու գծագրի, հենց մաքուր կտորի վրա եմ ստեղծագործում: Մեկը վրձինով է նկարում, ես էլ ասեղով»,- աում է Արփի Ավդալյանը:
Նա օգտագործելով խաչկար-ասեղնագործության տեխնիկան եւ հայկական գորգագործության հնագույն ավանդույթները, ստեղծում է արվեստի նոր տեսակ` զարմացնելով պատկերների համաչափությամբ ու գունային կատարյալ ներդաշնակությամբ:
Արփի Ավդալյանը մասնագիտությամբ նկարիչ-մոդելավորող է, 2013 թ. ավանդական արվեստների եւ փառատոների միջազգային կազմակերպության կողմից (CIOFF Armenia) արժանացել է «Ժողովրդական վարպետ, ասեղնագործող» կոչմանը:
Գ. ՀԱԿՈԲՅԱՆ
«Առավոտ» օրաթերթ
04.05.2016
