Մոսկվա. 4 մայիս, РИА Новости: Ռուսաստանի ԱԳՆ ղեկավար Սերգեյ Լավրովը Հայաստանի խորհրդարանականների՝ Լեռնային Ղարաբաղը ճանաչելու նախաձեռնության մեջ խուճապի պատճառներ չի տեսնում, քանի որ Երեւանը վստահեցնում է, թե տարածաշրջանի կարգավիճակը միակողմանի չի որոշվելու:
«Ինչ վերաբերում է Լեռնային Ղարաբաղը ճանաչելու թեմայի նոր քննարկումներին: Չէ՞ որ դա Հայաստանը չի քննարկում: Դա խորհրդարանի երկու անդամների առաջարկությունն է: Եվ Հայաստանի կառավարությունը, նրանց օրենքներով, ինչպես նրանք բոլորին բացատրել են՝ կրքերը հանդարտեցնելով, պետք է օրինագծի լուծում նախապատրաստի: Ես այս պահին ահազանգ չէի հնչեցնի եւ խուճապի չէի մատնվի», – ասել է նա РИА Новости-ին տված հարցազրույցում:
«Երբ ես Երեւանում էի, հետո երբ իմ գործընկերոջ հետ շփվում էի հեռախոսով, ավելի ուշ, երբ նա Մոսկվայում էր արդեն ապրիլի սկզբի իրադարձություններից հետո, ինձ հստակ հաստատել են Երեւանի հավատարմությունը խաղաղ կարգավորմանը: Դա նշանակում է, որ Ղարաբաղի կարգավիճակը կորոշվի ընդհանուր պայմանավորվածության ենթատեքստում, այլ ոչ թե միակողմանի», – ընդգծել է ռուս նախարարը:
Ավելի վաղ տեղեկացվել էր, թե Հայաստանի կառավարությունը հերթական նիստի օրակարգ քննարկման մտցրել է «Արցախի Հանրապետությունը ճանաչելու մասին» օրենքի նախագիծը (Արցախը Լեռնային Ղարաբաղի ինքնանունն է): Օրինագծի հեղինակներն են ընդդիմադիր պատգամավորներ Զարուհի Փոստանջյանը եւ Հրանտ Բագրատյանը:
Կարդացեք նաև
Հայաստանի ԱԳ նախարարի տեղակալ Շավարշ Քոչարյանը հայտարարել է, թե Լեռնային Ղարաբաղը ճանաչելու մասին օրենքը Երեւանում օրակարգ կմտնի Ադրբեջանի կողմից ռազմական նոր հակամարտություն սկսելու դեպքում:
