ՀՀԿ խմբակցության պատգամավոր Մկրտիչ Մինասյանը համոզված է, որ այսօր Հայաստանի կողմից`Արցախի անկախության ճանաչման ժամանակը դեռ չէ: «Հայելի» ակումբում լրագրողների հետ հանդիպմանը պարոն Մինասյանը նշեց, թե չգիտի` այդ ժամանակը, երբ է գալու. «Աշխարհը կհամոզվի, որ Ադրբեջանի կազմում երբևէ անհնար է հասկանալ ու տեսնել մի պետություն, որը բացարձակ ռասիզմ է դրսևորում հայերի նկատմամբ: Մենք պիտի փորձենք աշխարհի ընկալումները երկակի ստանդարտներից վեր բարձրացնել»:
Պարոն Մինասյանը նկատեց. «20-25 տարին մեկ մեր ոխերիմ հարևանները, ըստ էության իրենց քիթ ու մռթին պիտի ստանան, մենք դատապարտված ենք մեր ուժերով պարտադրելու խաղաղությունը»:
ԱԱԾ պետի նախկին տեղակալ Գուրգեն Եղիազարյանի կարծիքով` քնած հարձակումը Արցախի վրա, ճակատային գրոհը մեզ հնարավորություն է տալիս ճանաչել Արցախի անկախությունը: Ըստ նրա` մենք 10-15 օր ժամանակ ունենք, հետո արդեն հնարավորություն չի լինի. «Դա ճանապարհ կլինի մյուս երկրների համար, որոնք ասում են Հայաստանի կողմից Արցախի ճանաչմանը»:
Պարոն Եղիազարյանը, իհարկե, համոզված է, որ եթե մենք ընդունենք Արցախի անկախությունը, դիվանագետները կընկնեն որոշակի վատ վիճակի մեջ, բայց մյուս կողմից՝ Ադրբեջանը անցել է Ռուբիկոնը և հարձակվել խաղաղ բնակչության վրա` միջազգային նորմերը մի կողմ շպրտելով:
Կարդացեք նաև
Գուրգեն Եղիազարյանը շեշտեց. «Պահն է, եթե կորցրինք, հետո դժվար է լինելու ընդունել Արցախի անկախությունը: ՌԴ արտաքին գործերի նախարար Լավրովը հետաքրքիր հայտարարություն արեց, երբ հիշեցրին, որ ՀՀ-ում Արցախի ճանաչման խնդիրն են բարձրացնում պատգամավորները, նա պատասխանեց, թե «не суетитесь». այս բառի տակ շատ բան եմ հասկանում: Մենք կանգնած ենք մի լրջագույն փաստաթղթի շեմին, երբ կճանաչվի Արցախի անկախությունը»:
Պարոն Եղիազարյանը նաև շնորհակալություն հայտնեց ԼՂՀ նախագահ Բակո Սահակյանին և Հայ Առաքելական եկեղեցու Արցախի թեմի առաջնորդ Պարգեւ արքեպիսկոպոս Մարտիրոսյանին` այդպիսի տղամարդկային ու լրջագույն մոտեցումների համար:
Տաթև ՀԱՐՈՒԹՅՈՒՆՅԱՆ
