Արտաքին գործերի փոխնախարար Շավարշ Քոչարյանը մեկնաբանելով կառավարության այսօրվա որոշումը, որով հավանության արժանացավ ԱԺ պատգամավորներ Զարուհի Փոստանջյանի եւ Հրանտ Բագրատյանի՝ «Արցախի Հանրապետությունը ճանաչելու մասին» ՀՀ օրենքի նախագծի վերաբերյալ կառավարության եզրակացությունը, ասաց, որ, եթե Ադրբեջանը շարունակի նոր ագրեսիա, Հայաստանը կգնա Լեռնային Ղարաբաղի ճանաչման:
Արձագանքելով ՌԴ արտաքին գործերի նախարար Սերգեյ Լավրովի հայտարարությանը, որում ասվում էր, որ Ղարաբաղի խնդրի կարգավորման գաղափարների փաստաթղթային ձեւակերպումն իրատեսական է, Շավարշ Քոչարյանն ասաց` «Լավրովի հայտարարությունը շատ հստակ էր, որ այլընտրանք չկա խաղաղ կարգավորմանը, որին մենք միանշանակ կողմ ենք, որ պետք է ամրապնդվի կրակի դադարեցման ռեժիմը»:
Պարոն Քոչարյանը պատասխանելով, թե 1994 թվականին կնքած Բիշքեկյան պայմանագիրն այսօր որքանով է կենսունակ հարցին՝ ասաց, որ «Բիշքեկյան արձանագրությունները չափազանց կարեւոր էին, բայց իրականում դա հիմք էր, որից հետո արդեն կնքվեց բուն զինադադարի մասին պայմանագիրը»:
Կարդացեք նաև
Նշենք, որ այսօր Բիշքեկի պայմանագրի կնքման օրն է, որով Ադրբեջանը բանակցել է Արցախի հետ:
«Մի բանի վրա ուշադրություն դարձնենք, Բիշքեկն անսպասելի չառաջացավ, որովհետեւ էդ ո՞նց եղավ, որ կողմերը եկան այդ համաձայնությանը, որովհետեւ մինչ այդ եղել է երկար գործընթաց: Դեռեւս 1993 թվականի սեպտեմբերից Բաքուն ուղղակի բանակցությունների դուրս եկավ Ստեփանակերտի հետ, եւ եղան բազմաթիվ հանդիպումներ: Այդ ժամանակ էր այն հայտնի փաստը, որ Հեյդար Ալիեւն իր ստորագրությամբ լիազորեց իրենց խորհրդարանի փոխխոսնակին, որպեսզի բանակցություններ վարի ԼՂՀ ներկայացուցչի հետ՝ բարձր մակարդակի հանդիպում կազմակերպելու համար»:
Ըստ Շավարշ Քոչարյանի, նմանատիպ լիազորագիր ստացավ նաեւ այն ժամանակ ԼՂՀ արտաքին գործերի նախարար Արկադի Ղուկասյանը:
«Եթե Ադրբեջանը ցանկանում է բանակցային գործընթացում որեւէ արդյունք տեսնել, նա ուղղակի պետք է բանակցի Ստեփանակերտի հետ: Այդ տեսակետից, դա կարող է լակմուսային թուղթ լինել. «1994 թվականի այդ համաձայնագիրն ու դրանից հետո կնքվածը Ադրբեջանի միջազգային պարտավորությունն են: Դրա խախտումը նշանակում է խախտել միջազգային պարտավորությունը»:
Լուսինե ԲՈՒԴԱՂՅԱՆ
