Մայիսի 7-ին ԼՂՀ Ազգային ժողովում տեղի ունեցավ ՀՀ և ԼՂՀ խորհրդարանների արտաքին հարաբերությունների և պաշտպանության, ազգային անվտանգության ու ներքին գործերի մշտական հանձնաժողովների համատեղ դռնփակ նիստը` «Ապրիլյան պատերազմի հետևանքով ստեղծված ռազմա-քաղաքական իրադրությունը և դրանից բխող գործողությունները» թեմայով:
Նիստի ընթացքում բանախոսությամբ հանդես են եկել լրատվամիջոցների կովկասյան ինստիտուտի փոխտնօրեն Սերգեյ Մինասյանը («Ռազմական իրադրություն. մարտահրավերներ, խնդիրներ և զարգացումներ»), գլոբալիզացիայի և տարածաշրջանային կենտրոնի տնօրեն Ստեփան Գրիգորյանը և արտաքին քաղաքականության ու անվտանգության հարցերով հանրային խորհրդի ղեկավար Մասիս Մաիլյանը («ԼՂ հիմնախնդրի շուրջ առկա արտաքին քաղաքական միջավայրը. մարտահրավերներ և հնարավոր զարգացումներ»):
Ելույթներից հետո տեղի է ունեցել մտքերի փոխանակում, որի ընթացքում փորձագետները պարզաբանումներ են տվել պատգամավորների հնչեցրած հարցերին: Հաջորդ օրը, Երևան վերադառնալու ճանապարհին ՀՀ ԱԺ պատգամավորները,
լրատվամիջոցների կովկասյան ինստիտուտի փոխտնօրեն Սերգեյ Մինասյանը, գլոբալիզացիայի և տարածաշրջանային կենտրոնի տնօրեն Ստեփան Գրիգորյանը կանգ առան Բերձորում և հանդիպում ունեցան շրջվարչակազմի ղեկավարի տեղակալ Արտուշ Մխիթարյանի հետ: Ներկա էին նաև Բերձորի քաղաքապետ Արտյոմ Սարիբեկյանը, շրջվարչակազմի աշխատակազմի սոցապ վարչության պետ Վարդան Բաղդասարյանը, շուրջօրյա գործող ՔՊ շտաբի անդամներ: Հյուրերը հետաքրքրվեցին Քաշաթաղի շրջանի բնակչության զբաղվածության խնդիրներով (կարևորեցին, որ տարածքում իրականացվեն ներդրումներ՝ գյուղատնտեսական ապրանքների մշակման գործարան հիմնելու և այլ նպատակներով):
Հյուրերը տեղեկացան նաև բնակարանային պայմանների, կրթական համակարգի, ճանապարհների վիճակի, գյուղատնտեսության և այլ հարցերի մասին: Ա. Մխիթարյանը ներկայացրեց վիճակը, կարևորեց բնակարանների, ճանապարհների կարգավորման խնդիրը: Տեղեկացրեց, որ վերջին տարիներին ԼՂՀ կառավարության կողմից բնակչությանը հատկացվում է շինանյութ, որը խթանում է բնակարանաշինությունը, սակայն անելիքներ շատ-շատ կան: Տեղեկացվեց, որ այս պահին Քաշաթաղի շրջանի կողմից բարեկարգվում է Խնձորեսկ-Որոտան ճանապարհահատվածը:
Կարդացեք նաև
Մ. Շահգելդյանը տեղեկացրեց, որ մինչ Բերձոր հասնելը, հանդիպում են ունեցել նաև Շուշիիում; Կարևորեց այն, որ պետք է ավելին արվի Արցախի, հատկապես ազատագրված տարածքների տնտեսության զարգացման համար: Հավելեց, որ պետք է զարգացնենք տնտեսությունը, գիտությունը, և ամեն ինչ ուղղորդենք հայոց երկրի անվտանգությանը: Ճանապարհվելիս ՀՀ ԱԺ ներկայացուցիչները նշեցին, որ այսուհետ նման հանդիպումները կլինեն հաճախակի:
Զոհրաբ ԸՌՔՈՅԱՆ
