Արարատ Դանիելյանին մեղադրանք է առաջադրվել այն բանի համար, որ Անդրանիկ Խոջումյանի կողմից կատարված հանցագործությունը պարտակելու` հանցագործության հետքերը թաքցնելու նպատակով, 2014թ. ապրիլի 2-ից մինչև 2014թ. ապրիլի 3-ն ընկած ժամանակահատվածում, ինքը, Անդրանիկ Խոջումյանը, Հովիկ Խեչյանը, Գերասիմ Գուլակյանը հավաքել են դեպքի վայրում Անդրանիկ Խոջումյանի կողմից կրակված փամփուշտների պարկուճները և դրանք նետել Իջեւան քաղաքի հարավային ծայրամասում, Իջեւան-Դիլիջան ավտոճանապարհի եզրին գտնվող «Իջեւանատուն» ռեստորանահյուրանոցային համալիրի հետնամասում գտնվող տարածքում:
Այնուհետեւ նա Հովիկ Խեչյանի անասնաֆերմայի աշխատակիցներ Թաթուլ Մադաթյանի և Յարբեկ Դավթյանի հետ հանել է «Իջևանատուն» ռեստորանահյուրանոցային համալիրի մուտքի դարպասը, կտրել պարսպի վրայի ճաղերը, որից հետո դարպասն ու ճաղերը տեղափոխել են Հովիկ Խեչյանին պատկանող անասնաֆերմա` վերանորոգման, որտեղ Արթուր Առաքելյանը դարպասի վրա կրակված հետքերը զոդելու եղանակով վերանորոգել է այն,ապա նույն կազմով դարպասը տեղափոխել են համալիր ու տեղադրել:
Արարատ Դանիելյանին մեղադրանք է առաջադրվել ՀՀ քրեական օրենսգրքի 334 հոդվածի 1-ին մասով: Նրա նկատմամբ խափանման միջոց է ընտրվել չհեռանալու մասին ստորագրությունը: Ա. Դանիելյանի դատավարությունը սկսվել է 2015թ. դեկտեմբերի 8-ին, հերթական նիստը նշանակված է 2016թ. մայիսի 11-ին :
Անդրանիկ Խոջումյանը, որը 2015թ. օգոստոսի 5-ին Տավուշի մարզի առաջին ատյանի դատավոր Ռաֆիկ Մելքոնյանի վճռով դատապարտվել էր վեցուկես տարվա ազատազրկման, 2016թ. մարտի 29-ին ՀՀ քրեական գործով վերաքննիչ դատարանի կողմից անմեղ էր ճանաչվել, նրա գործողությունները դատարանի կողմից որակվել էին որպես ինքնապաշտպանություն:
Կարդացեք նաև
Ի դեպ, չնայած բավական ժամանակ է անցել, սակայն վերաքննիչ դատարանի այդ որոշումը տեղադրված չէ «Դատալեքս» դատական տեղեկատվական համակարգում:
Ոսկան ՍԱՐԳՍՅԱՆ
