ՀՀ ԱԺ պատգամավոր, ՀՀ արտաքին գործերի նախկին նախարար Ալեքսանդր Արզումանյանի կարծիքով` ՀՀ-ն ԼՂՀ անկախությունը պիտի ճանաչեր ապրիլի 3-ին: «Մեդիա կենտրոն»-ում հրավիրված քննարկմանը պարոն Արզումանյանը, անդրադառնալով այն փաստին, որ ՀՀ կառավարությունը հավանություն տվեց ԱԺ պատգամավորներ Զարուհի Փոստանջյանի եւ Հրանտ Բագրատյանի՝ «Արցախի Հանրապետությունը ճանաչելու մասին» ՀՀ օրենքի նախագծի վերաբերյալ կառավարության եզրակացությանը, նշեց. «Կառավարությունը դրական եզրակացություն չի տվել, բայց բացասական էլ չի տվել: Բոլորս փորձում ենք հասկանալ` ի վերջո ի՞նչ եզրակացություն է տվել: Համամիտ եմ` դա եղել է բոլոր երեք նախագահների օրոք, որ այն պահին, երբ ԼՂՀ-ն հարձակման ենթարկվի, ՀՀ-ն պետք է պատրաստ լինի ճանաչել ԼՂՀ անկախությունը: Ինքս գտնում եմ, որ եթե մեր ընկալման մեջ այս քառօրյա պատերազմն իրոք պատերազմ էր, ապա պետք էր ճանաչել ԼՂՀ անկախությունը ապրիլի 3-ին և հնարավորություն տալ իշխանությանը շարունակել ռազմական գործողությունները: Եթե այդ պահին դա չարեցինք, հիմա արդեն անիմաստ է դառնում և արժեզրկվում ճանաչման գաղափարը»:
Պարոն Արզումանյանը հայտնեց, որ ՀՀ ԱԺ արտաքին հարաբերությունների հանձնաժողովը դրական եզրակացություն կտա ներկայացված օրենսդրական նախաձեռնությանը, այն կմտնի ԱԺ մեծ օրակարգ և կպահվի այնքան ժամանակ, որքան պետք է:
ՀՀԿ խմբակցության պատգամավոր Խոսրով Հարությունյանը նշեց, որ ԼՂՀ ճանաչման խնդիրը օրակարգում չէ, բայց դա չի նշանակում, որ հարցը ընդհանրապես քննարկման ենթակա չէ:
«Ժառանգություն» խմբակցության պատգամավոր Թևան Պողոսյանը նոր է վերադարձել Արցախից: Փոխանցելով այնտեղ գոյություն ունեցող տրամադրությունները այս հարցի վերաբերյալ` նշեց. «Այնտեղ չեն կարող հասկանալ, որ այդ նախաձեռնության հեղինակները 131 պատգամավորները չեն: Բոլորի համար Արցախում անհասկանալի է այսքան երկար այդ հարցի քննարկումը»: Պարոն Պողոսյանը կարևորեց այն, թե արդյոք ունե՞նք այն հաշվարկները` ինչպես ենք մենք օգտագործելու այդ գործիքը, ինչպես Ադրբեջանը և միջազգային հանրությունը:
Կարդացեք նաև
Հիշեցնելով Սերժ Սարգսյանի մամուլի խոսնակ Վլադիմիր Հակոբյանի հայտարարությունը, թե ճանաչման մասին առաջինը կլսենք Սերժ Սարգսյանի շուրթերից, պարոն Պողոսյանը նշեց, որ ապրիլի 3-4-ին ՀՀ նախագահը հանձնարարական էր տվել ռազմաքաղաքական համագործակցության մասին պայմանագիր պատրաստել ԼՂՀ-ի հետ, սակայն մեկ ամսից ավելի է անցել, բայց չգիտենք` այդ քննարկումն ու գործընթացը ուր է հասել:
Տաթև ՀԱՐՈՒԹՅՈՒՆՅԱՆ
Լուսանկարը` «Մեդիա կենտրոն»-ի
