«Ազգային ժողովում օրենքները գրվում են օլիգարխների համար, ինչպես միլիոնների ատկատներ անել, ինչպես Միխայիլ Բաղդասարովին արտոնություն տալ»,-կառավարական ամառանոցի առջեւ ասում էին «Մենք ենք տերը մեր երկրի» նախաձեռնության անդամները, որոնք երթով Բաղրամյան-Պռոշյան խաչմերուկից շարժվեցին դեպի կառավարական ամառանոցներ:
Տեղ հասնելուն պես երթի կազմակերպիչները նախագահ Սերժ Սարգսյանին դուրս հրավիրեցին` «երեսին ասելու, թե ժողովուրդն ինչ է մտածում իշխանությունների մասին»:
Նաեւ պահանջեցին, որ այն «միլիոնավոր դոլարները, որոնք թալանվել են այսքան տարիների ընթացքում»՝ վերադարձվեն բյուջե, որպեսզի բանակի համար զենք գնվի, իսկ իրենք էլ պաշտոններից հեռանան, քանի որ պաշտոնի են եկել «կեղծված ընտրություններով, Մարտի մեկի զոհերի արյան գնով»:
Կարդացեք նաև
Երեւանի փոխոստիկանապետ Վալերի Օսիպյանին ակցիայի կազմակերպիչները հորդորեցին նախագահին դուրս կանչել եւ նրան դրա համար 10-15 րոպե ժամանակ տվեցին: Խոստացան, որ, եթե Օսիպյանը քաղաքացիների պահանջը չկատարի` որոշում կկայացնեն անհնազանդությունների դիմել:
Վալերի Օսիպյանը սակայն պատասխան ելույթ ունեցավ` ասելով, որ ոստիկանների նպատակը քաղաքացիներին բերման ենթարկելը չէ, խաղաղ ակցիային խոչընդոտելը չէ, բայց, եթե նրանք օրենքին հակառակ գործողություններ անեն, ստիպված կլինեն օրենքի ուժով հարցը լուծել:
«Նոր Հայաստան» կուսակցության անդամ Գագիկ Եղիազարյանը պատասխան պահանջեց, թե ինչո՞ւ են 105 զինվորներ զոհվել, թե ինչո՞ւ բանակի սպառազինության եւ մնացած հարցերի համար պատասխանատուները չեն պատժվում եւ շարունակում են հանգիստ պաշտոնավարել. «Ժողովրդի առաջ մեկդ տղամարդկություն ունեցեք պատասխանեք: Ես իմ անունից խոստանում եմ, երբ հաջորդ անգամ գամ հայ զինվորին աջակցության ակցիային, չեմ գա խաղաղությամբ կանգնեմ, որ Սերժ Սարգսյանը կամ այլ մեկը, որը Մարտի մեկի արյան գնով զավթել է այս երկրի իշանությունը, հիմի էլ իր ախպեր Ալիեւի հետ թափում է 18-20 տարեկան հայ զինվորի արյունը հետո էլ Միխայիլ Բաղդասարովների ու եսիմ ում պարտքերը ներում»:
Նախագահն այդպես էլ կառավարական ամառանոցից դուրս չեկավ, եւ ակցիայի մասնակիցները կրկին հետ դարձան Բաղրամյան 26, որտեղ էլ երթն ավարտեցին:
Լուսինե ԲՈՒԴԱՂՅԱՆ
