Գերմանիայի Հալլե քաղաքի կենտրոնում, ուր անցյալ տարի տեղադրվեց հայկական խաչքար, մայիսի 13-ին իրենց հարգանքի տուրք են մատուցել Սաքսեն Անհալտ երկրամասի հայ համայնքի ներկայացուցիչները գերմանացի քաղաքական գործիչների և հոգևոր առաջնորդների հետ միասին: Հուշ-միջոցառումը կազմակերպել է տեղի հայ համայնքը հոգևոր առաջնորդ Տեր Գնել քահանա Գաբրիելյանի գլխավորությամբ:
«Մենք անցած տարի Հալլեի կենտրոնում կանգնեցրինք հայկական խաչքար, մայիսի 10-ին մեծաթիվ կազմով օծեցինք այն: Այս տարի ևս մայիսի այս օրերին մեր հարգանքի տուրքն այստեղ մատուցեցինք, որ մյուս միջոցառումների հետ համատեղեինք, այսինքն մյուս համայնքների իրադարձություններին չխանգարեինք»,- մեզ հետ զրույցում պարզաբանեց Տեր Գնել քահանա Գաբրիելյանը:
Ելույթի խոսքով հանդես են եկել Հալլեի քաղաքապետ դր. Բերնդ Վիգանդը, ով հիմնականում անդրադարձել է Հայոց Ցեղասպանության հարյուրամյա պատմությանը, ներկա փուլին և տեղի հայկական համայնքի հետ արդյունավետ և համերաշխ համագործակցության ընթացքին:
Հայկական կողմին մշտապես աջակցելու, օժանդակելու համար քաղաքապետին և ներկա գտնվողներին իր շնորհակալության խոսքն է ուղղել Հալլեի հայ համայնքի վարչության ատենապետ Հարություն Մանուկյանը:
Կարդացեք նաև
Այնուհետև հոգևոր դասի կողմից կատարվել է բարեխոսական աղոթք հայերեն և գերմաներեն տարբերակով: Այն կատարել են Տեր Գնել քահանա Գաբրիելյանը, Սաքսեն Անհալտ երկրամասի հոգևոր պատասխանատու, քահանա Յուրգեն Դիտտրիխը և Հալլե քաղաքի կաթոլիկ եկեղեցիների հոգևոր պատասխանատու Ռայնհարդ Հենչելը:
Երեկոյան միջոցառումը շարունակվել է դահլիճում, որտեղ նախ ողջույնի խոսքով ելույթ է ունեցել Գերմանիայում ՀՀ արտակարգ և լիազոր դեսպան Աշոտ Սմբատյանը: Հուշ համերգի ընթացքում ելույթ են ունեցել երկու ակապելլա կատարողներ` Արփինե Օհանյանը և Հասմիկ Միրոյանը:
Գայանե Առաքելյան
Արվեստագիտության թեկնածու
