Հայաստանի ու Ադրբեջանի հետ ԵՄ-ը նախատեսում է նոր համաձայնագրեր: Այսօր այս մասին եւս մեկ անգամ խոսվել է Բրյուսելում ընթացող «Արեւելյան գործընկերություն» ծրագրի մասնակից երկրների արտգործնախարարների 7-րդ ամենամյա հանդիպմանը, որի մասնակիցներից է նաեւ Հայաստանը:
Քաղաքական վերլուծաբան Ստյոպա Սաֆարյանը վստահ է, որ այս նոր համաձայնագիրն էլ կշրջանցի ԼՂ հիմնահարցը, ինչպես նախորդը՝ Ասոցացման համաձայնագիրը:
«Եթե նայենք ԵՄ վերաբերմունքը ղարաբաղյան հարցին, ապա կտեսնենք, որ այն բացարձակապես սահմանափակվել է ընդհանուր հռչակագրային բնույթի հայտնի սկզբունքների թվարկումով եւ գիտակցվել է ԵՄ կողմից, որ այդ խնդրով ոչ կարող է հայամետ, ոչ ադրբեջանամետ դիրքորոշում որդեգրել: Դրա պատճառով չի կարող բալանսներ խախտել ու նախընտրել է ուղղակի շրջանցել խնդիրը: Լավագույնը, որ փորձել են անել, բազմակողմ համագործակցության ձեւաչափերի կամ տարբեր ծրագրերի միջոցով նպաստել հասարակություններում տրամադրությունների եւ թշնամանքի մեղմմանը, ինչը տարիներ առաջ ուղղակի փակվեց Ադրբեջանի կողմից»,- ասաց պարոն Սաֆարյանը:
Ըստ պարոն Սաֆարյանի, Հայաստանը չափազանց կարեւոր երկիր է ԵՄ համար, որ ՀՀ իշխանություններից դժգոհելու արդյունքում կորցնեն Հայաստանը. «Ապրիլյան քառօրյա պատերազմը, թերեւս, առայժմ միայն նայում ենք Հայաստան-Ադրբեջան, Թուրքիա- ՌԴ պրիզմայով, բայց մոռանում ենք, թե ինչպիսի դասեր են քաղում այնպիսի խոշոր դերակատարները, ինչպիսիք է ԵՄ-ը: Այս կտրվածքով, Եվրամիության համար տեսանելի է, որ Կովկասում ստեղծված իրավիճակը արդյունք է նաեւ ուժերի բավականին վտանգավոր բալանսի խախտման, որը սկսվել է տարիներ առաջ ու այդ խախտված բալանսի պայմաններում տեղի են ունենում պատերազմներ, որոնք կարող են ԵՄ շահերը վտանգել:
Կարդացեք նաև
Թերեւս, ԵՄ-ն այս կտրվածքով ավելի ու ավելի է զգում աշխատելու հակամարտության երկու կողմերի հետ էլ: Այդ հանդիպման ընթացքում Լատվիայի ԱԳ նախարարը կոչ է արել Ասոցացման համաձայնագրեր ստորագրել ՀՀ ու Ադրբեջանի հետ: Իհարկե, այն երբեք չի բանակցվել ու չի էլ բանակցվի Ադրբեջանում, քանի որ բռնապետական ռեժիմը այդ երկրում շահագրգռված չէ ժողովրդավարական ազատություններով, մյուս կողմից մշտապես փորձել է այդ հանգամանքը վաճառել ՌԴ վրա, որպես ավելի նվիրվածության նշան: Երեւանի համար առաջ է եկել անվտանգության քաղաքականությունը եւ արտաքին քաղաքականությունը դիվերսիֆիկացնելու հրամայական, եւ ԵՄ-ը դա տեսնում է ու երկուստեք շահագրգռվածություն կա հարաբերությունների ընդլայնման առումով. Շահագրգռված է ե՛ւ Հայաստանը, ե՛ւ ԵՄ-ը, որի համար շատ կարեւոր է լցնել այն վակուումը, որը առաջացել է ԵԱՏՄ-ի նախագծի ներխուժմամբ:
Արփինե ՍԻՄՈՆՅԱՆ
