«Պետք է մաքրել կյանքը կոռուպցիայից եւ բացասական երեւույթներից, որովհետեւ դա են պահանջում մեր արտաքին մարտահրավերները»,-համոզված է ԱԺ պատգամավոր, «Հանրապետական» խմբակցության անդամ, «Սահմանադրական իրավունք» միություն(ՍԻՄ) կուսակցության նախագահ Հայկ Բաբուխանյանը:
«Հակակոռուպցիոն պայքարի նոր մեխանիզմ պետք է ձեւավորվի, հին ձեւերով պայքարը կարծես արդյունավետ չէ: ՍԻՄ-ն առաջարկում է ստեղծել հատուկ լիազոր հանձնաժողով, որը կարող է գործել Անվտանգության խորհրդի շրջանակներում, որովհետեւ կոռուպցիայի խնդիրն անվտանգությանն է վերաբերում: Հանձնաժողովը պետք է ունենա օրենքով ամրագրված հնարավորություններ` կոորդինացնելու համար մի շարք գերատեսչությունների աշխատանքը»,-այսօր` մայիսի 24-ին, «Անդրադարձ» մամուլի ակումբում, խոսելով ՀՀ վարչապետի` կոռուպցիայի դեմ պայքարի ծրագրից, ասաց նա:
Հայկ Բաբուխանյանը կարծիք հայտնեց, որ պետական համակարգը պետք է վերանայել եւ փոփոխել, մասնավորապես` «կրճատել» որոշ գերատեսչություններ: Իսկ թե որ գերատեսչություններն են ավելորդ, Բաբուխանյանը չմեկնաբանեց` ասելով, որ հարցն ուսումնասիրության կարիք ունի. «Պետական ապարատը պետք է կրճատվի: Պետք է ուսումնասիրել` արդյոք պե՞տք են այդքան շատ գերատեսչություններ եւ վերահսկողներ»:
ՀՀԿ-ական պատգամավորն անդրադարձավ նաեւ կառավարության` 800 ծառայողական մեքենա կրճատելու որոշմանը եւ որոշ պաշտոնյաների` ծառայողական մեքենաներն ընտանիքի կարիքների համար օգտագործելու հանգամանքը «խայտառակություն» որակեց. «Խայտառակություն է, երբ ամեն մի միջին պաշտոնյա ունի երեք օգնական, ասենք` քսան քարտուղար եւ վարորդներ: Անթույլատրելի է: Կառավարությունը պետք է սահմանի շեմ, որպեսզի շատ բարձր գնով ծառայողական մեքենաներ չգնվեն»:
Կարդացեք նաև
Լրագրողներից մեկը հետաքրքրվեց, թե ինչ մեքենա է վարում Բաբուխանյանը: Վերջինս ասաց, որ ծառայողական մեքենայից չի օգտվում, վարում է սեփական ավտոմեքենա, քանի որ ԱԺ պատգամավորներն օրենքով չունեն ծառայողական մեքենա. «Վարում եմ 2009 թ. արտադրության «BMW X3» մակնիշի ավտոմեքենա, որը յոթ տարվա միջին դասի մեքենա է, թանկ չէ, իմ հնարավորությունները թույլ են տվել այն ձեռք բերել 11.000 դոլարով»:
Այլ մանրամասները քիչ ուշ` տեսանյութում:
Լուիզա ՍՈՒՔԻԱՍՅԱՆ
