Մեր երկրում կյանքի դժվարին իրավիճակում հայտնված երեխան միանգամից հայտնվում է գիշերօթիկ հաստատությունում կամ մանկատանը, քանի որ Ընտանեկան օրենսգրքով, «Սոցիալական աջակցության մասին» ՀՀ օրենքով եւ այլ իրավական ակտերով հստակ սահմանված չեն կյանքի դժվարին իրավիճակում հայտնված երեխայի՝ այլընտրանքային խնամքի ուղղորդման առաջնահերթությունները:
Քաղաքակիրթ աշխարհում, նախքան երեխային շուրջօրյա խնամքի հաստատություն ուղեգրելը, քննարկվում է նրա խնամքը այլընտրանքային խնամքի, առաջին հերթին՝ ընտանիքահեն խնամքի միջոցով կազմակերպելու հնարավորությունը, այդ թվում՝ տեղավորում խնամատար ընտանիքում, աջակցողական ծառայությունների տրամադրում երեխայի խնամքի կամ սոցիալական հոգածության ցերեկային կենտրոնում եւ այլն, եւ միայն դրանց անհնարինության դեպքում, որպես խնամքի կազմակերպման տարբերակ դիտարկվում է շուրջօրյա խնամք իրականացնող հաստատության որեւէ տիպում երեխայի տեղավորումը:
«Նման իրավիճակը չի բխում երեխայի լավագույն շահերից եւ չի համապատասխանում երեխայի իրավունքների պաշտպանության մասին միջազգային իրավական փաստաթղթերին, մասնավորապես՝ ՄԱԿ-ի կողմից Երեխաների այլընտրանքային խնամքի 2009թ.ընդունած ուղեցույցին»,- կառավարության մայիսի 26-ի նիստին վարչապետին կհայտնի աշխատանքի եւ սոցիալական հարցերի նախարար Արտեմ Ասատրյանը` ներկայացնելով կյանքի դժվարին իրավիճակում հայտնված երեխաների՝ այլընտրանքային խնամքի տրամադրման նպատակով ուղղորդման կարգը եւ չափորոշիչները, համաձայն որի, նման իրավիճակում հայտնված երեխան նախեւառաջ պետք է վերադարձվի կենսաբանական ընտանիք, եթե դա հնարավոր չէ, նոր միայն դիտարկվեն խնամքի այլ տարբերակները:
«Նշված համաձայնագրով նման կարգի ընդունումն ու կիրառումը դիտարկվում է որպես բնակչության սոցիալական պաշտպանության շուրջօրյա հաստատություններ երեխաների մուտքը կանխարգելող միջոց, իսկ այդ հաստատություններում երեխաների տեղավորումը` որպես վերջին կամ ծայրահեղ միջոց, ինչպես նշված է ՄԱԿ-ի 2009թ. Երեխաների այլընտրանքային խնամքի ուղեցույցում»,-նկատում է պարոն Ասատրյանը:
Կարդացեք նաև
Կառավարության նիստի օրակարգ ներկայացրած փաստաթղթում նախագծի ընդունման դեպքում, ըստ պարոն Ասատրյանի, կիրականացվեն համակողմանի եւ շարունակական աշխատանքներ՝ շուրջօրյա խնամքի հաստատություններում տեղավորված երեխաներին կենսաբանական ընտանիք վերադարձնելու ուղղությամբ, հնարավորինս կկանխարգելվի երեխաների մուտքը շուրջօրյա խնամքի հաստատություններ:
Լուսինե ԲՈՒԴԱՂՅԱՆ
