ՀՀ ՊՆ մամուլի խոսնակ Արծրուն Հովհաննիսյանի կարծիքով` «Զինվորի բաժին» պահածոների` Լեհաստանի խանութներում ազատ վաճառքի հետ կապված շատ տարբերակներ կարող են լինել:
Aravot.am-ի հետ զրույցում Արծրուն Հովհաննիսյանը հայտնեց` քանի դեռ գործի նյութերի ուսումնասիրման փուլն է, որևէ հստակ բան ասել հնարավոր չէ:
Հիշեցնենք, որ երեկ ահազանգ էր ստացվել, որ Լեհաստանի խանութներում ազատորեն վաճառվում են «Զինվորի բաժին» պահածոները, որոնց վրա նույնիսկ գրված է, որ վաճառքի ենթակա չէ:
Այսօր տեղեկատվություն տարածվեց, որ ՀՀ գլխավոր դատախազի տեղակալ, զինդատախազ Արտավազդ Հարությունյանի հանձնարարությամբ ուսումնասիրվում է Լեհաստանում ՀՀ ԶՈՒ-ին մատակարարվող պահածոների վաճառքի մասին տեղեկատվությունը: ՀՀ զինդատախազության, Պաշտպանության նախարարության և Լեհաստանում ՀՀ դեսպանի հետ քննարկման արդյունքում, Լեհաստանում ՀՀ դեսպանը պաշտոնական նամակով դիմել է Լեհաստանի դատախազությանը, Բելսկո Բիալա քաղաքի խանութներից մեկում ՀՀ ԶՈՒ-ին մատակարարվող պահածոների վաճառքի մասին տեղեկատվությունը ստուգելու, նման ապրանքատեսակի ձեռքբերման աղբյուրը պարզելու և, անհրաժեշտության դեպքում, համապատասխան իրավական գործընթաց իրականացնելու խնդրանքով:
Կարդացեք նաև
Արծրուն Հովհաննիսյանից հետաքրքրվեցինք` այս իրավիճակում արդյոք պատասխանատվություն չի՞ կրում ՀՀ ՊՆ-ն, արդյոք որո՞նք են նրա գործառույթները, պարոն Հովհաննիսյանը ձեռնպահ մնաց մեկնաբանություններ անելուց` հորդորելով սպասել գործի նյութերի ուսումնասիրության ավարտին. «Ձեռքիս տակ նյութեր չունեմ, բայց տարբերակներ շատ կարող են լինել»:
Տաթև ՀԱՐՈՒԹՅՈՒՆՅԱՆ
