«Ուժեղ կողմն է մյուսին քայլեր հարկադրում»,- մայիսի 27-ին «Հայացք» մամուլի ակումբում լրագրողների հետ հանդիպման ընթացքում ասաց Միջազգային եւ անվտանգության հարցերի հայկական ինստիտուտի հիմնադիր, քաղաքական վերլուծաբան Ստեփան Սաֆարյանը:
Նա նշեց, որ ուժեղի վրա չեն կարող հարձակվել, եւ եթե հարձակվել են Հայաստանի վրա, նշանակում է, որ Հայաստանին ուժեղ չեն համարել:
ԱԺ Հանրապետական խմբակցության անդամ Կարինե Աճեմյանը, սակայն, նկատեց, որ այնպես չէ, որ Ադրբեջանը ժողովրդավար երկիր է. Ադրբեջանում մեծ խնդիրներ կան մամուլի ազատության հետ, կոռուպցիան սարսափելի չափերի է հասնում. «Ես կարծում եմ, որ մեր բոլոր միջազգային հարթության գործընկերները այդ մասին տեղյակ են: Ուղղակի մենք առավել ակտիվ պիտի դիվանագիտական խողովակներն աշխատեցնենք, որպեսզի կարողանանք նրանց բերել այդ բանակցական սեղանի շուրջ, կամ կարողանանք ստիպել, որպեսզի խաղաղությունը պահպանվի»:
Ստյոպա Սաֆարյանը նկատեց, որ Հայաստանը չի կարողանալու դա կատարել, քանի դեռ Ադրբեջանից մի քանի անգամ չի հզորացել, քանի դեռ Ադրբեջանի համար միջազգային կառույցներում լրջագույն խնդիրներ չի ստեղծում: Նա ընդգծեց, որ ապրիլյան դեպքերից մեկ ամիս է անցել, սակայն պարզ չէ, թե արդյոք Հայաստանի Հանրապետությունը դիմել է միջազգային կառույցներին. «Մենք Վիեննայում չպետք է նեղվեինք եւ զգայինք, որ Ադրբեջանի գնահատականներին գնահատական չեն տալիս: Մենք մինչեւ Վիեննա, դա արդեն պետք է արած լինեինք ՄԱԿ-ում, մենք պետք է դա արած լինեինք ԵԽԽՎ-ում, որտեղ պետք է, այո՛, պետք է խնդիր հարուցվեր Ադրբեջանի՝ ստանձնած պարտավորությունները խախտելու մասին»:
Կարդացեք նաև
Ամի ՉԻՉԱԿՅԱՆ
