«Արցախյան շարժումից հետո առ այսօր ՀՀ պետական քաղաքականության մեջ Նախիջեւանի խնդիրը գոյություն չունի»,-ասում է հայագետ, նախիջեւանագետ Արգամ Այվազյանը:
«Մոդուս Վիվենդի» կենտրոնում մայիսի 27-ին կազմակերպված քննարկման ժամանակ նա ասաց, որ 1998-2006թթ. Նախիջեւանում Ադրբեջանի իշխանությունների թույլտվությամբ եւ նախաձեռնությամբ վերացվել է հայկական մշակութային հետքը. մասնավորապես, ոչնչացվել են 27 հազար հայկական վանքեր, եկեղեցիներ, խաչքարեր եւ այլ հուշարձաններ. «Մինչ օրս ՀՀ-ն այս խնդրին միջազգային մակարդակով հետամուտ չեղավ եւ չկարողացավ դատապարտել Ադրբեջանի վանդալիզմը: Ավելին, այդ հուշարձաններից մնացած արխիվային նյութերը եւ չափագրությունները ՀՀ-ն չի պետականացնում եւ գնում, որպեսզի արխիվը մնա հետագա սերունդներին»:
Արգամ Այվազյանը հայտնեց, որ այդ խնդրով 2008թ.-ից դիմում է պետական կառույցներին, սակայն ապարդյուն. «Ավելին, այն տարիներին, երբ Նախիջեւանում հայկական հուշարձանները ենթարկվում էին մշակութային ցեղասպանության, Երեւանում` 2006թ. Երեւանի գունավոր տպագրության տպարանում մնացած իմ ծավալուն եռալեզու աշխատանքը` 26.000 տպաքանակով, ոչնչացվեց… Ահա այսպիսին է մեր պետության վերաբերմունքը Նախիջեւանի եւ մեր պատմական տարածքների հանդեպ»:
Այվազյանը մանրամասնեց, որ խոսքը «Նախիջեւան. գիրք հուշարձանաց» ծավալուն ալբոմ-աշխատության մասին է. «Հրատարակչությունը չէր կարողացել տպարանի ծախսերը վճարել, խմբաքանակը մնացել էր տպարանում, վերջինս էլ ոչնչացրեց այն…Ցավոք, այսպիսին է վերաբերմունքը»:
Կարդացեք նաև
Լուիզա ՍՈՒՔԻԱՍՅԱՆ
